Ermənistanın 3 dövlət məktəbində növbəti tədris ilindən Azərbaycan dili kursları təşkil olunacaq. 2025-2026-cı tədris ilindən etibarən həyata keçiriləcək bu təşəbbüs çərçivəsində 10-12-ci sinif şagirdləri üçün Azərbaycan və türk dilləri, 5-ci sinifdən isə fars və gürcü dilləri tədris olunacaq. Proqram könüllü əsasda tətbiq ediləcək və onun həyata keçirilməsi ixtisaslı müəllimlərin mövcudluğundan asılı olacaq. Maraqlıdır, Azərbaycandakı orta məktəblərdə də erməni dilinin tədrisi mümkündürmü?
Milli Məclisin Elm və təhsil komitəsinin sədr müavini Fariz İsmayılzadə Modern.az-a deyib ki, Ermənistanda Azərbaycan dili fənninin tədrisi uzunmüddətli perspektivdə qarşılıqlı anlaşmanın və dialoqun möhkəmlənməsinə gətirib çıxara bilər.
“Əgər ermənilər bizim mənbələri, ədəbiyyatımızı və tariximizi oxusalar, vəziyyətə daha real baxa bilərlər. Bu zaman onlar dünyanı, eləcə də regionu daha obyektiv görər, uydurma miflərdən uzaq durar və Azərbaycanın mövqeyini daha yaxşı anlayarlar”,- deyə sədr müavini söyləyib.Elm və təhsil komitəsinin üzvü Ceyhun Məmmədov isə bildirib ki, Azərbaycandakı orta məktəblərdə erməni dilinin tədrisi istiqamətində addımlar atıla bilər və bu, olduqca vacibdir:
“Uzun illərdir ki, Ermənistan Azərbaycanla bağlı müxtəlif layihələr həyata keçirir. Qeyd etmək lazımdır ki, Ermənistan artıq çoxdan Azərbaycanla bağlı elmi tədqiqatlar aparır, ölkəmizi öyrənir. Bu gün bizim də eyni istiqamətdə ciddi addımlar atmağa ehtiyacımız var”.
Deputat həmçinin vurğulayıb ki, biz də Ermənistanı dərindən öyrənməli, onun tarixini, cəmiyyətini, siyasətini və mədəniyyətini ciddi şəkildə araşdırmalıyıq:
“Azərbaycanda bu istiqamətdə müəyyən dövlət qurumları və strukturları tərəfindən addımlar atılır, lakin bu proses mərhələli şəkildə həm orta məktəblərdə, həm də universitetlərdə davam etdirilməlidir.
Bizim üçün region dövlətlərini öyrənmək son dərəcə mühüm əhəmiyyət daşıyır. Bölgənin tarixini dərindən bilmədən oradakı proseslərə hakim olmaq, düzgün siyasət yürütmək mümkün deyil”.
C.Məmmədov onu da əlavə edib ki, təkcə Ermənistanı deyil, Gürcüstanı, Rusiyanı və digər qonşu ölkələri də yaxından öyrənməli, onların dillərini mənimsəməliyik:
“Bu, bizim üçün həm vacib, həm də strateji baxımdan prioritet məsələdir. Bu baxımdan, sözügedən məqsədə mütləq şəkildə nail olmalıyıq. Gec olmadan bu prosesə öz töhfəmizi verməli və onu sistemli şəkildə həyata keçirməliyik”,- deyə deputat qeyd edib.
