Kənd Təsərrüfatı Nazirliyində son vaxtlar "dinamika" müşahidə edilir.
Belə ki, Kənd Təsərrüfatı Naziri Məcnun Məmmədov bu günə qədər daim mətbuatdan qaçır, brifinqlər, mətbuat konfransları keçirmirdi. Bunun bircə dəfə də olsun şahidi olmamışıq.
Baxmayaraq ki, rəhbərlik etdiyi sahə ilə bağlı ölkədə bir sıra xəstəliklər tüğyan edir. Xüsusilə, dabaq xəstəliyi geniş vüsət aldı, minlərlə mal-qara tələf oldu. İnsanlar, xüsusən də, regionlarda mal-qara saxlayanlar, fermerlər, sahibkarlar çıxılmaz vəziyyətə düşdü. Belə bir vəziyyyətin yaranmasına baxmayaraq, Məcnun Məmmədov və Kənd Təsərüfatı Nazirliyinin rəhbər şəxsləri susmağa üstünlük verdilər.
1xeber.media xəbər verir ki,Manset.az xəbər portalı bu hadisələr fonunda Kənd Təsərrüfatı Nazirliyi, şəxsən nazirin özü Məcnun Məmmədov və Aqrar Xidmətlər Agentliyinin rəhbəri Sərdar Hacıyevlə bağlı silsilə tənqidi yazılar yayımladı.
Həm xəbər portalımız, həm də saytımızın tabeliyindəki milyonlarla izləyicisi olan sosial şəbəkə hesabları vasitəsilə tənqidi yazıları ictimaiyyətə təqdim etdik. Bununla bərabər mətbuata danışmayan Məcnun Məmmədovdan bir neçə mövzu ətrafında açıqlamalar alıb ictimaiyyətə çatdırdıq. Xüsusilə, bir nüansı qeyd etmək istəyərik ki, saytımızda yayımlanan "Kənd Təsərrüfatı Nazirliyinin gecikmiş dabaq xəstəliyi tədbiri" adlı yazımız ictimaiyyət tərəfindən geniş müzakirə obyektinə çevrildi. Ölkədə nazirlik tərəfindən xəstəliklərlə bağlı heç bir qabaqlayıcı tədbirlərin görülmədiyi bu vaxtlarda əkin-biçin mövsümü, buğda-arpa biçini mövsümü və payız fəsli ilə bağlı olan görüləcək tədbirlər də xəstəliklərlə bağlı yayılan bütün bu proseslərin içində əriyib bitdi. Beləliklə, Kənd Təsərrüfatı Nazirliyi və Məcnun Məmmədovun özü 2025-ci ili böyük uğursuzluqlarla başa vurur...
İlin sonuna sayılı günlərin qaldığı bu vaxtda nazirlikdə bizim tənqidi yazılarımızdan sonra kiçik "dinamikalar" müşahidə edilir. Nazirin özü müsahibə verərək həyata keçirə bilmədikləri işlərlə bağlı mediaya nəsə deməyə çalışır...
İşin maraqlı tərəfi də budur ki, nazir Məcnun Məmmədov verdiyi müsahibədə ölkədə tüğyan edən xəstəliklər və nazirlikdə olan korrupsiya faktları ilə bağlı bir cümlə də işlətməyib.
İzləyicilərimizə onu da bildirək ki, növbəti həftə Kənd Təsərrüfatı Nazirliyi ilə bağlı yazılarımız davam edəcək. Nazirliyin dövlət qurumu tərəfindən böyük miqdarda cərimələnməsinin səbəbləri və korrupsiya faktları ilə bağlı ciddi materiallar yayımlayacağıq.
