Son dövrlərdə Rusiya və Gürcüstanda pensiyaçıların kommunal xidmətlər üzrə maliyyə yükünü azaltmaq məqsədilə dövlət tərəfindən ödənişlərin müəyyən hissəsinin qarşılanması mexanizmi geniş tətbiq olunur. Məsələ Azərbaycanda da bu cür təcrübənin mümkünlüyünü gündəmə gətirib.
Mövzu ilə bağlı konkret.az-a açıqlama verən iqtisadçı Rəşad Həsənov bildirib ki, dünya təcrübəsində həssas sosial qrupların, o cümlədən pensiyaçıların rifahını yaxşılaşdırmaq üçün müxtəlif alətlərdən istifadə edilir. Onun sözlərinə görə, kommunal xidmətlər üzrə güzəştli tariflərin müəyyən olunması bir çox ölkələrdə, xüsusilə də keçmiş SSRİ məkanında geniş tətbiq edilən mexanizmlərdəndir.
“Bu yolla hökumət əslində gəlirlərin yenidən bölüşdürülməsi üçün yeni bir zəmin yaradır. Həssas qruplar daha əlverişli şərtlərlə kommunal xidmətlərə çıxış əldə edir, bu isə onların ailə büdcəsini daha optimal idarə etməsinə şərait yaradır. Pensiya və təqaüdlərin digər sahələrə – sağlamlıq, istirahət və sosial ehtiyaclara yönələn hissəsi genişlənir,” – deyə ekspert qeyd edib.
Rəşad Həsənov hesab edir ki, Azərbaycanda da belə mexanizmin tətbiqi üçün iqtisadi imkanlar mövcuddur:
“Burada yalnız müvafiq qanunvericiliyin formalaşdırılması və qeyd edilən məsələnin həlli üçün hüquqi baza yaradılması qalır. Texniki baxımdan hər hansı maneə yoxdur.”
Bununla belə, ekspert hökumətin hazırkı siyasətinə diqqət çəkərək yaxın perspektivdə belə güzəşt mexanizmlərinin tətbiqinin gözlənilmədiyini vurğulayıb:
“Bu istiqamətdə hər hansı müzakirə getmir. Yaxın zamanda bu tip güzəştlərin tətbiq olunması ehtimalı çox aşağıdır.”
Beləliklə, dünyada geniş tətbiq olunan model Azərbaycanda da mümkündür, lakin mövcud siyasi və iqtisadi yanaşma fonunda hələlik gündəmdə deyil.
