Prezident Administrasiyasının sabiq rəhbəri Ramiz Mehdiyevin keçmiş deputat Gültəkin Hacıbəyliyə bağışladığı əmlaklarla bağlı yeni siyahı yayılıb. Məlum olub ki, Mehdiyev Hacıbəyliyə bir neçə ev və müxəlif ərazilərdə torpaq sahələri bağışlayıb.
Bu əmlakların qanuni yollarla Gültəkin Hacıbəylidən alınması mümkündürmü?
Globalinfo.az-a danışan deputat Vüqar İskəndərov bildirib ki, antimilli şuranın fəal üzvü olan Gültəkin Hacıbəyli parlamentdə fəaliyyət göstərdiyi beş il ərzində bir çox əmlaklara sahib olub:
“O, yeni seçildiyi dövrdə Mehdiabad bələdiyyəsinin əlillər üçün ayrılmış torpaq sahəsindən 12 sot ərazini ələ keçirib. Daha sonra məlum olub ki, Hacıbəyli birinci qrup əlillərin ərazisinin bir hissəsini də mənimsəyib. Bundan başqa, Goranboy rayonunda torpaq sahələri və böyük villa, Abşeron rayonunda, Goradil kəndində, Mehdiabad qəsəbəsində, Şamaxı rayonunda və digər yerlərdə torpaq sahələri, Səbail rayonunda ofis, bakı şəhərinin Nəsimi və Yasamal rayonlarında mənzillər əldə edib. Bütün bu əmlaklar hazırda hüquq mühafizə orqanları tərəfindən araşdırılır”.
Deputat deyib ki, Gültəkin Hacıbəyli istintaqa təqdim olunduqdan sonra bu əmlakların necə əldə edildiyi və qanunsuz yollarla əldə olunub-olunmadığı barədə əlavə sorğu-sual aparılacaq:
“Əgər qanunsuzluq aşkar edilərsə, əmlakların geri alınması hüquqi çərçivədə təmin olunacaq. Ədalət mütləq şəkildə bərpa olunmalıdır. Ümumiyyətlə, Hacıbəylinin Ramiz Mehdiyev ilə əlaqələri ona ölkə ərazisində geniş əmlak əldə etmək imkanı yaradıb. Hüquqi prosedurlar tamamlandıqdan sonra bu məsələnin də hüquqi çərçivədə həll olunacağı gözlənilir”.
Vəkil Rəsul Cəfərov Gültəkin Hacıbəylinin əmlaklarının onun əlindən alınmasının hüquqi baxımdan mümkün olduğunu bildirib:
“Əgər həmin əmlaklar cinayət nəticəsində əldə edilib və ya cinayət əməlinin predmetini təşkil edibsə, eyni zamanda, əmlakı alan şəxs də onların cinayətkar yolla əldə olunduğunu bilərək qəbul edibsə və ya cinayət əməlinin törədilməsində iştirak edibsə, bu halda əmlak müsadirə oluna bilər. Əks halda, müsadirəyə yol verilmir”.
Gültəkin Hacıbəylinin əmlak siyahısını təqdim edirik:
“NLT” MMC tərəfindən inşa edilmiş Bakı şəhəri Nəsimi rayonu Dilarə Əliyeva küçəsi, 251A nömrəli 15 mərtəbəli binada Gültəkin Hacıbəyliyə gizli şəkildə iki müasir mənzil təmir olunmuş vəziyyətdə hədiyyə edilib. Həmin mənzillərdən biri Gültəkin Hacıbəylinin atası Yunis Hacıyevin adındadır. Söhbət həmin ünvanda yerləşən 179.4 kv.m sahəsi olan 183 nömrəli mənzildən gedir. G.Hacıbəyli sözügedən mənzili hazırda yüksək məbləğə kirayə verib.
Həmin binanın 13-cü mərtəbəsində yerləşən digər mənzil isə Hacıbəylinin bacısı Aytən Hacıyevanın adına rəsmiləşdirilib. 178.18 kv.m sahəsi olan dördotaqlı mənzildə isə G.Hacıbəyli özü tək yaşayıb.
– Goranboy rayonu, Xan Qərvənd kəndində 92 sotluq torpaq sahəsi və onun üzərində yerləşən 400 kv. metr sahəsi olan nəhəng villa;
– Goranboy rayonu, Nadirkənd kəndində 5 hektar, Borsunlu kəndində 6.25 hektar, Aşağı Ağcakənd kəndində 1.76 hektar, 58-ci məhəllədə hər biri 8 sot olmaqla 2 torpaq sahəsi;
– Abşeron rayonu, Xırdalan şəhərində 60 sot torpaq sahəsi;
– Goradil kəndində 30 sot torpaq sahəsi;
– Abşeron rayonu, Mehdiabad qəsəbəsində hər biri 4 sot olmaqla üç yerdə topaq sahəsi;
– Abşeron rayonu, Mehdiabad qəsəbəsində 6 sot torpaq sahəsi;
– Şamaxı rayonu, Qaleybuğurd kəndində 12 sot torpaq sahəsi;
– Bakı şəhəri, Nəsimi rayonu, Dilarə Əliyeva küçəsi, ev 251 a ünvanında 178,18 kv. metr sahəsi olan mənzil;
– Bakı şəhəri, Nəsimi rayonu, Dilarə Əliyeva küçəsi, ev 251 A ünvanında 179,14 kv. metr sahəsi olan digər mənzil;
– Bakı şəhəri, Yasamal rayonu, İnşaatçılar prospekti, ev 12/26 ünvanında 63,3 kv. metr sahəsi olan mənzil;
– Bakı şəhəri, Səbail rayonu, Mehdi Hüseyn küçəsi 61, ev 2 ünvanında mənzil;
– Bakı şəhəri, Nəsimi rayonu, Səməd Vurğun küçəsi, ev 92 A ünvanında mənzil.
Bütün bunlar Gültəkin Hacıbəylinin Ramiz Mehdiyevə “xidmətləri” qarşılığında əldə etdikləridir. İndi isə qanun qarşısında cavab vermək zamanı çatıb.
