“Mətbuatda xəbər verilir ki, 2025- ci ilin ilk 10 ayı ərzində Azərbaycana 42 465,69 ton palma yağı idxal edilib. Sonrakı 2 ayda da idxalın eyni templə davam etdiyini nəzərə alsaq, sadə hesablama yolu ilə ölkənin əhalisinin ildə 50 min tondan artıq palma yağı istehlak etdiyi məlum olar”.
1xeber.media Globalinfo.az-a istinadla xəbər verir ki, bunu Azərbaycan Tibb Universitetinin dosenti Fuad İslamzadə bildirib.
Onun sözlərinə görə, bu, hər bir Azərbaycan vətəndaşına il ərzində 5 kq və daha artıq palma yağı yedizdirildiyi mənasına gəlir:
“Ancaq hamıya məlumdur ki, bizim pərakəndə satış obyektlərində satılan yağların heç birinin üstündə palma yağı yazılmayıb. Demək bu qədər yağ Azərbaycan xalqına 1 kiloqramının qiyməti 15 manatdan 40 manata qədər olan qablaşdırılmış yağların, qeyri-adi dərəcədə baha qiymətə satılan süd və süd məhsullarının, həmçinin biskvit və digər şirniyyatın tərkibində yedizdirilir.
Palma yağının insan orqanizmi üçün ən ziyanlı yağ olduğu şübhə doğurmur və bu yağın alınıb Azərbaycana gətirilməsi üçün hər kiloqramına 1,38 dollar( 2,35 AZN) xərc çəkilir. Bir sözlə, əhali tərkibinə palma yağı daxil olan məhsulları həm dəyərindən dəfələrlə artıq qiymətə alır, həm də bu yolla öz orqanizminə ziyan vurur”.
