İcbari tibbi sığortanın təsis edilməsinin 10 illik yubileyi üçün fevralın 17-nə planlaşdırılan tədbir gözlənilməz şəkildə təxirə salınıb. Mənbələr bildirir ki, bu, TƏBİB-in icraçı direktoru Vüqar Qurbanovun vəzifədən azad olunmasından sonra yaranan vəziyyətlə bağlıdır. Qeyd edilir ki, V.Qurbanovun işdən çıxarılması digər məmuru – İcbari Tibbi Sığorta üzrə Dövlət Agentliyinin İdarə Heyətinin sədri Zaur Əliyevi də hədəfə gətirib. İddialar arasında onların adının tender maxinasiyasında çəkilməsi də var.
İcbari Tibbi Sığorta üzrə Dövlət Agentliyində ciddi kadr dəyişiklikləri və proses çərçivəsində Zaur Əliyevin vəzifədən azad edilməsi mümkündürmü?
Globalinfo.az-a danışan iqtisadçı, sabiq deputat Vahid Əhmədov deyib ki, icbari tibbi sığortanın Azərbaycanda tətbiqi məsələsi Milli Məclisdə də müzakirə edilib:
“Həmin dövrdə Səhiyyə Nazirliyinin iki hissəyə bölünməsi məsələsi də ortaya çıxmışdı. Mən Milli Məclisin komitə iclaslarında dəfələrlə bildirmişdim ki, səhiyyə sistemi bölünməməlidir. Səhiyyəni iki yerə ayırmaq – bir hissəsini ayrıca qurum kimi, digər hissəsini isə nazirlikdə saxlamaq düzgün yanaşma deyil. İcbari Tibbi Sığorta Agentliyi Səhiyyə Nazirliyinin tərkibində də yaradıla və uğurla tətbiq oluna bilərdi”.
Kadr siyasətinə gəldikdə, Vahid Əhmədov bildirib ki, bu məsələ dövlət başçısının səlahiyyətinə aiddir:
“Təyinatlar və vəzifədən azadetmələr müəyyən prinsiplər və qərarlar əsasında həyata keçirilir. Tender məsələləri ilə bağlı konkret məlumatım yoxdur. Ümumilikdə isə etiraf etmək lazımdır ki, ölkədə satınalmalar sahəsində müəyyən problemlər mövcud olub. Son dövrlərdə bu istiqamətdə qanunvericilikdə ciddi dəyişikliklər edilib və bəzi müsbət nəticələr artıq görünməkdədir”.
V.Əhmədov Zaur Əliyevlə bir neçə dəfə təmasda olduğunu qeyd edib:
“Onu savadlı və müraciətlərə həssas yanaşan bir şəxs kimi tanımışam. Həm deputat olduğum dövrdə, həm də sonrakı mərhələdə icbari tibbi sığorta ilə bağlı müraciətlərə operativ reaksiya verib. Ümumilikdə hesab edirəm ki, hazırkı şəraitdə səhiyyə sisteminin vahid model əsasında birləşdirilməsinə ciddi ehtiyac var. Bu halda həm icbari tibbi sığorta sistemi daha effektiv işləyər, həm də ümumi səhiyyə idarəçiliyində şəffaflıq və koordinasiya güclənər”.
İqtisadçı və hüquqşünas Əkrəm Həsənov isə deyib ki, rəhbər vəzifəli şəxsin azad edilməsindən dərhal sonra yubiley tədbirinin təxirə salınması müəyyən suallar doğurur:
“Bu addım onu deməyə əsas verir ki, qurum daxilində çaxnaşma və ya qeyri-müəyyənlik var. Tender məsələlərinə gəlincə, ümumilikdə dövlət qurumlarının əksəriyyəti tender maxinasiyası ilə məşğuldur. Bu istiqamətdə zaman-zaman müxtəlif iddialar səsləndirilir. Əgər konkret pozuntu faktları varsa, onlar hüquqi müstəvidə araşdırılmalı və qanun çərçivəsində qiymətini almalıdır. Əks halda, ümumi iddialarla hər hansı nəticəyə gəlmək düzgün olmaz”.
