Azərbaycanlı iş adamı Şahəddin Abdullayev qaynı Oqtay İbrahimovu xüsusi ittiham qaydasında məhkəməyə verib.
1xeber.media teleqraf-a istinadla xəbər verir ki,buna səbəb Oqtay İbrahimovun media vasitəsilə Şahəddin Abdullayevi Prezident Administrasiyasının sabiq rəhbəri Ramiz Mehdiyevlə iş birliyində ittiham etməsidir.
Belə ki, O.İbrahimov mətbuatda Ş.Abdullayevin dövlətə xəyanətdə ittiham olunan Ramiz Mehdiyevin “qara kassa”sı adlandırıb.
Bundan başqa Oqtay İbrahimov bildirib ki, iş adamı Ramiz Mehdiyevə hakimiyyətin zorla ələ keçirmək planlarının həyata keçirilməsində və digər pərdəarxası fəaliyyətlərində ona hərtərəfli dəstək olub. Onun sözlərinə görə, Şahəddin Abdullayev məhz Ramiz Mehdiyevin sayəsində 25 ilə yaxın müddət ərzində Ukraynanın Mariupol Metallurgiya Zavodundan vaqonlarla dəmir məmulatları gətirərək, Azərbaycanda bu sahədə monopoliya qurub və inanılmaz sərvətə sahib olub.
Qaynı kürəkəni olan iş adamını eyni zamanda, S.Vurğun küçəsində “Zabitlər bağı” ilə üz-üzə inşa etdirdiyi yaşayış kompleksindən Ramiz Mehdiyevin oğlu Teymur Mehdiyevə ev hədiyyə etdiyini də bildirib. Onun sözlərinə görə, Ş.Abdullayev Ramiz Mehdiyevin hakimiyyətdə mövqeyinin zəiflədiyi dövrdə qanunsuz yollarla Türkiyənin İstanbul şəhərində 5 milyon dollar dəyərində “Eurobond” istiqrazları yerləşdirib, eyni zamanda, İstanbuldakı “Burhan” bankına yarım milyon dollar əmanət qoyub.
Ş.Abdullayev məhkəmədə Ramiz Mehdiyevlə münasibətlərini təkzib edib, onunla hər hansı əlaqəsinin olmadığını bildirib. Bu səbəbdən qaynı Oqtay İbrahimovun onun barəsində səsləndirdiyi ittihamlara görə 6 ay müddətinə həbsini istəyib.
Məhkəmə iclasında təqsirləndirilən şəxs qismində çıxış edən Oqtay İbrahimov özünü təqsirli bilməyib. O, Şahəddin Abdullayevlə yaxın qohum və dost olduğundan Ramiz Mehdiyevlə olan yaxınlığı, sonuncu vasitəsi ilə əldə etdiyi toxunulmazlıq və pullar barədə məlumatlı olduğunu bildirib. Oqtay İbrahimov bütün bu bildikləri barədə müvafiq dövlət orqanlarına açıq məktublar yazdığını açıqlayıb. O, sonda məhkəmədən bəarət verilməsini xahiş edib.
Oqtay İbrahimovun əməlində Cinayət Məcəlləsinin 147.2-ci maddəsində nəzərdə tutulmuş cinayətin tərkibi olmadığından və təqsirliliyi sübuta yetirilmədiyindən ona həmin maddə ilə bəraət verilib.
