Azərbaycanda icbari tibbi sığorta sisteminin idarəetmə modelində dəyişiklik edilə biləcəyi barədə müzakirələr aparılır.
Etibarlı mənbələrdən Sfera.az-a verilən məlumatlara görə, gələcəkdə icbari tibbi sığorta qurumunun Dövlət Sosial Müdafiə Fondunun (DSMF) nəzdinə verilməsi məsələsi gündəmdədir.
Məlumata əsasən, bu addım sığorta sisteminin daha mərkəzləşdirilmiş şəkildə idarə olunmasına xidmət edə bilər. Bildirilir ki, dünyada da analoji təcrübə mövcuddur və bir sıra ölkələrdə sosial və tibbi sığorta mexanizmləri eyni sistem daxilində idarə olunur. Bu model maliyyə axınlarının koordinasiyasını asanlaşdırmaq, sığorta fondlarının fəaliyyətini vahid mexanizm altında toplamaq məqsədi daşıyır.
Hazırda Azərbaycanda icbari tibbi sığorta sistemi dövlət səviyyəsində tətbiq olunur və əhalinin tibbi xidmətlərə çıxışını təmin edən əsas mexanizmlərdən biridir. Sistem çərçivəsində vətəndaşlara geniş “Xidmətlər Zərfi” təqdim olunur və bu paketə daxil olan tibbi xidmətlərin siyahısı vaxtaşırı genişləndirilir.
Mənbələrin sözlərinə görə, planlaşdırılan struktur dəyişiklikləri həyata keçirilərsə, icbari tibbi sığortanın idarəetməsində müşahidə şurası modeli tətbiq oluna bilər. Ehtimal olunur ki, bu qurumun müşahidə şurasının sədri səhiyyə naziri olacaq.
Digər tərəfdən, səhiyyə sisteminin idarə olunmasında mühüm rol oynayan TƏBİB də icbari tibbi sığorta mexanizmi ilə sıx bağlı fəaliyyət göstərdiyi üçün yeni struktur dəyişiklikləri həmin quruma da təsir edə bilər. Bildirilir ki, icbari tibbi sığorta DSMF-nin nəzdinə veriləcəyi halda TƏBİB rəhbərliyinin təyinat mexanizmində də dəyişiklik mümkündür.
İlkin müzakirələrə görə, gələcəkdə TƏBİB sədrinin namizədliyi DSMF tərəfindən təqdim edilə, son qərar isə Səhiyyə naziri tərəfindən təsdiq edilə bilər. Bu isə səhiyyə və sosial sığorta sisteminin idarə olunmasında koordinasiyanın gücləndirilməsinə yönəlmiş addım kimi qiymətləndirilir.
Qeyd edək ki, hazırda bu məsələ ilə bağlı rəsmi qərar açıqlanmayıb. Lakin sosial və tibbi sığorta mexanizmlərinin bir sistemdə cəmləşdirilməsi idarəetmənin daha səmərəli qurulmasına və maliyyə resurslarının daha effektiv bölüşdürülməsinə imkan yarada bilər.
