Fransa Yaxın Şərqdə müharibə başlayandan bəri ilk dəfə olaraq ABŞ-ın strateji bombardmançı təyyarələrinin İrana doğru gedərkən öz hava məkanından keçməsinə icazə verib.
1xeber.media xəbər verir ki,“Itamilradar” nəşrinin 20 mart tarixində yaydığı məlumata görə, Fransa ərazisindən iki B-52H və iki B-1 təyyarəsi uçub keçib. Bütün təyyarələr İngiltərənin Qlosterşir qraflığındakı Britaniyaya məxsus “Ferford” aviabazasından havaya qalxıb. Uçuş zamanı bombardmançıların üzərində qanadlı raketlər müşahidə edilib.
Bundan əvvəl ABŞ bombardmançıları Böyük Britaniyadan Yaxın Şərq istiqamətində uçarkən kontinental Avropanın hava məkanından qaçır və Cəbəllüttariq vasitəsilə uçurdular. “The Aviationist” nəşrinin ehtimalına görə, uçuş planlaşdıranlar bu vaxta qədər Avropa ölkələrinin ərazisi üzərindən keçid üçün müraciət etməyiblər. Fransa ABŞ və İsrailin İrana qarşı müharibəsinə qoşulmasa da, martın əvvəlində amerikalı müttəfiqlərinə Yaxın Şərqdəki bazalarından istifadə etməyə icazə verib.
