İsveç dronlara qarşı müdafiə imkanlarını gücləndirir.
1xeber.media xəbər verir ki, Müdafiə Material Təminat İdarəsi (FMV) “Bofors” və “Saab” şirkətləri ilə 8,7 milyard kron (təxminən 850 milyon ABŞ dolları) dəyərində müqavilələr imzalayıb. Sazişlər müdafiə naziri Pol Yonson tərəfindən təqdim olunub.
Bundan əlavə, Norveçin “Nammo” və Finlandiyanın “Sisu” şirkətləri ilə sursatın, həmçinin təxminən 70 ədəd yük maşınının və “Terrängbil 24” xizəkli-tırtıllı nəqliyyat vasitələrinin tədarükünə dair müqavilələr bağlanıb. Bu satınalma ərazi hava hücumundan müdafiə sistemlərinin inkişafına dair dövlət proqramının bir hissəsidir.
Yeni sistemlərə “BAE Systems Bofors Tridon Mk2” mobil 40 mm-lik zenit topları, 30 mm-lik toplarla təchiz edilmiş “Saab Trackfire” uzaqdan idarə olunan modullar, həmçinin radarlar, idarəetmə və radioelektron mübarizə sistemləri daxildir. Bu hava hücumundan müdafiə vasitələri xüsusilə dron və helikopterlərə qarşı effektivdir.
Sistemlərin yüksək hərəkət qabiliyyəti hava hücumundan müdafiə vasitələrinin uzun məsafələrə sürətlə yerləşdirilməsinə imkan verir. Onlar həm hərbi bölmələrin, həm də elektrik stansiyaları, nəqliyyat qovşaqları və şəhərlər daxil olmaqla mühüm mülki infrastrukturun qorunması üçün nəzərdə tutulub.
Tədarükün 2027–2028-ci illərdə həyata keçirilməsi planlaşdırılır və bu proses FMV, İsveç Silahlı Qüvvələri və ölkənin müdafiə sənayesinin birgə təşəbbüsü olan “Gute” layihəsi çərçivəsində reallaşdırılacaq. Perspektivdə İsveç ordusu 50-yə qədər ərazi hava hücumundan müdafiə bölməsi yaratmağı planlaşdırır.
