Avropa ölkələrinin Azərbaycana marağı artıq epizodik deyil, davamlı və strateji xarakter daşıyır.
1xeber.media xəbər verir ki, bunu AZƏRTAC-a açıqlamasında türkiyəli iqtisadçı-ekspert İlhan İşbaş bildirib.
Onun fikrincə, bu marağın əsasını qitənin enerji təhlükəsizliyi ilə bağlı artan narahatlıqları, alternativ mənbə və marşrutlara ehtiyac, eləcə də Azərbaycanın həyata keçirdiyi balanslı xarici siyasət təşkil edir. Son dövrlərdə baş tutan yüksək səviyyəli səfərlər, xüsusilə Çexiyanın Baş naziri Bakıya gəlişi və Ukrayna Prezidenti Volodimir Zelenskinin Azərbaycana səfəri bu reallığın açıq göstəricisidir.
Ekspert qeyd edib ki, Avropa enerji xəritəsində baş verən dəyişikliklər fonunda Azərbaycan etibarlı və uzunmüddətli tərəfdaş kimi ön plana çıxır.
“Təbii qaz təchizatında sabitlik, müqavilələrə sadiqlik və mövcud infrastrukturun genişləndirilməsi imkanları Avropa üçün xüsusi əhəmiyyət daşıyır. Bu baxımdan Cənub Qaz Dəhlizi yalnız enerji layihəsi deyil, həm də geosiyasi sabitlik alətidir. Avropanın enerji təhlükəsizliyində Azərbaycanın rolu yaxın illərdə daha da artacaq və bu əməkdaşlıq yeni mərhələyə keçəcək. Çexiya Baş nazirinin Azərbaycana səfəri çərçivəsində aparılan müzakirələr də bu əməkdaşlığın dərinləşdiyini göstərir. Enerji ilə yanaşı, sənaye, yüksək texnologiyalar və nəqliyyat sahələrində əməkdaşlığın genişləndirilməsi istiqamətində atılan addımlar Azərbaycanı Avropa üçün çoxşaxəli tərəfdaşa çevirir. Bu isə münasibətlərin yalnız enerji sahəsi ilə məhdudlaşmadığını, daha geniş iqtisadi platformaya keçdiyini nümayiş etdirir. Digər tərəfdən, Ukrayna Prezidenti Volodimir Zelenskinin Azərbaycana səfəri regionda dəyişən geosiyasi reallıqlar fonunda xüsusi əhəmiyyət daşıyır. Bu səfər Azərbaycanın beynəlxalq münasibətlər sistemində oynadığı balanslaşdırıcı rolun təsdiqidir. Rəsmi Bakı müxtəlif siyasi qütblər arasında körpü rolunu oynayaraq dialoq və əməkdaşlıq mühitinin formalaşmasına töhfə verir”, - deyə ekspert vurğulayıb.
İ.İşbaş bildirib ki, Azərbaycan Prezidenti İlham Əliyevin həyata keçirdiyi praqmatik və çoxvektorlu xarici siyasət kursu ölkənin beynəlxalq nüfuzunu əhəmiyyətli dərəcədə artırıb. Onun sözlərinə görə, bu siyasət Azərbaycanın həm Avropa İttifaqı, həm də digər regional və qlobal aktorlarla etibarlı münasibətlər qurmasına imkan yaradıb: “Azərbaycanın uğurunun əsas səbəbi məhz milli maraqlara əsaslanan çevik və balanslı diplomatiyadır. Bununla yanaşı, Azərbaycanın nəqliyyat-logistika imkanlarının genişlənməsi, xüsusilə Orta Dəhlizin artan əhəmiyyəti Avropa üçün əlavə üstünlüklər yaradır. Bu marşrut Avropa ilə Asiya arasında yükdaşımaların daha sürətli və təhlükəsiz həyata keçirilməsinə şərait yaradır, eyni zamanda regional iqtisadi inteqrasiyanı gücləndirir”.
Ekspert əlavə edib ki, bərpaolunan enerji sahəsində Azərbaycanın atdığı addımlar da Avropanın marağını artıran əsas amillərdəndir. Xəzər dənizinin külək enerjisi potensialı, günəş enerjisi layihələri və yaşıl enerji ixracı perspektivləri gələcək əməkdaşlığın yeni istiqamətlərini müəyyən edir.
“Azərbaycanın enerji diplomatiyası, geosiyasi mövqeyi və balanslı xarici siyasəti onu Avropa üçün əvəzolunmaz tərəfdaşa çevirir. Mövcud dinamika göstərir ki, qarşıdakı dövrdə Azərbaycan–Avropa münasibətləri daha da dərinləşəcək, ölkəmizin strateji rolu isə yalnız regionda deyil, qlobal miqyasda da möhkəmlənəcək”, - deyə türkiyəli ekspert vurğulayıb.
