Samux rayonunda keçirilən yas mərasimində kütləvi zəhərlənmə hadisəsi baş verib.
1xeber.media Qafqazinfo-ya istinadən xəbər verirki, Hadisə rayonun Lək kəndində qeydə alınıb. İlkin məlumata görə, mərasimdə iştirak edən 21 nəfər qidadan zəhərlənmə şübhəsi ilə xəstəxanaya yerləşdirilib. Onlara dərhal tibbi yardım göstərilib. Hazırda zəhərlənənlərin vəziyyətinin qənaətbəxş olduğu bildirilir.
Məlumata görə, zəhərlənənlər arasında azyaşlılar da var.
Azərbaycan Qida Təhlükəsizliyi Agentliyi Musavat.com-un sorğusuna cavab olaraq bildirib ki, 20 may 2026-cı il tarixində Samux rayonunun Lək kəndində keçirilən yas mərasimində baş verən hadisə ilə əlaqədar Azərbaycan Qida Təhlükəsizliyi Agentliyinin regional bölməsinin əməkdaşları tərəfindən araşdırma aparılıb.
Məlum olub ki, özlərini narahat hiss edən 21 nəfərə tibb müəssisəsində yardım göstərildikdən sonra evə buraxılıblar.
Hadisənin səbəblərinin müəyyənləşdirilməsi məqsədilə mərasimdə təqdim olunan, məişət şəraitində hazırlanan qidalardan müayinələrin aparılması üçün nümunələr götürülərək laboratoriyaya təqdim edilib.
Araşdırmalar davam etdirilir.
