Bakı–Tbilisi istiqamətində qatar reyslərinin yenidən bərpa olunması vətəndaşlarda böyük maraq yaratsa da, bilet satışının başlaması ilə qiymətlər ətrafında ciddi narazılıq yaranıb. Sosial şəbəkələrdə və ictimai müzakirələrdə xüsusilə biletlərin baha olması, bəzi hallarda təyyarə qiymətləri ilə müqayisə edilməsi sərt tənqid edilir.
Görəsən, yaranan narazılıqlardan sonra dövlət qiymətlərə müdaxilə edəcəkmi?
1xeber.media xəbər verir ki, mövzu ilə bağlı Konkret.az-a açıqlama verən Ağ Partiya sədri Tural Abbaslı bildirib ki, müəyyən olunan qiymətlər Azərbaycan reallıqlarına uyğun deyil:
“Bir az da qiymətləri qaldırsaydılar, Bakı–Tbilisi təyyarə bileti ilə eyni səviyyəyə çatacaqdı. Təyyarə ilə 40 dəqiqəyə getmək olur, amma qatarla 10 saat vaxt sərf edilir. Hansı kriteriyalarla bu qiymətlərin müəyyən olunduğu başa düşülmür. Dəmir yollarından bildirirlər ki, guya müasir qatarlar gətirilib. Bir mənada XXI əsrdə normal standart qatarların gətirilməsini xalqa minnət kimi təqdim edirlər. Deyirlər ki, əvvəlki qatarlardan fərqlidir. Əgər qiymət artımının səbəbi yeni qatarların alınmasıdırsa, onda köhnə sovet qatarlarını reysə buraxsınlar, insanlar da münasib qiymətə istifadə etsin. Bu məntiqlə sabah təyyarə şirkətləri də təyyarənin qiymətini biletin üzərinə əlavə edib sata bilər. Hələ 81 manat standart qiymətdir. Komfort və komfort-plus biletlərinin qiymətləri isə ümumiyyətlə fantastikdir”.
Tural Abbaslı qeyd edib ki, bəzi hallarda Gürcüstana avtomobillə getmək qatardan daha sərfəlidir: “Maraqlısı budur ki, insanlar Böyük Kəsikdən Gürcüstana taksi ilə gedə bilir. Taksi ilə keçid 5-6 manata başa gəlir, amma qatar biletləri 51 manatdan başlayır. Bu artıq bilet qiyməti deyil, sərhəddən keçmə haqqıdır. ADY bizdən qatar pulunu almır, sərhədi keçirdiyinə görə əlavə ödəniş tələb edir. Amerika–Meksika sərhədində də dəllallar pul alıb insanları keçirirlər. Azərbaycanda da ADY vətəndaşları sərhəddən keçirmək üçün sanki “dəllal” pulu alır. Belə qiymətlər ola bilməz. Qiymətlər müəyyənləşdirilərkən əhalinin sosial vəziyyəti nəzərə alınmalıdır. Dövlət lazım gələrsə subsidiya vasitəsilə biletləri əlçatan etməlidir”.
