"Avrasiya İqtisadi Birliyi (AİB) Ermənistana qarşı tədbirlər görməyə çalışmır, lakin onun hərbi-siyasi birliyə çevrilmiş Avropa İttifaqına can atması narahatlıq doğurur".
1xeber.media xəbər verir ki, bunu Rusiya Baş nazirinin müavini Aleksey Overçuk TASS-a verdiyi müsahibədə deyib.
"Əvvəla, AİB-dən heç kim Ermənistana qarşı hər hansı bir konkret tədbir görmək istəmir. Ermənistan AİB-in üzvüdür. Ermənistan onun daxilində bütün öhdəliklərini vicdanla yerinə yetirir. Bunu məsuliyyətlə deyə bilərəm, çünki biz AİB daxilindəki öhdəliklərindən hər hansı bir yayınmanı müəyyən etmək üçün Ermənistanın bütün hüquqi və müqavilə bazasını izləyirik. Və biz bu cür hadisələri aşkar etmirik”, - deyə o qeyd edib.
Overçuk Ermənistanın Avropa standartlarına keçmək istəyini bəyan etməsinə diqqət çəkib: "Amma demək istəyirəm ki, bütün Avropa standartları pis deyil. Orada çoxlu yaxşı şeylər olub və var. Bizi narahat edən nədir? Avropa İttifaqı bu gün əslində hamımızın yaxşı bildiyi iqtisadi inteqrasiya birliyindən transformasiya olunub və orada bir çox yaxşı və cəlbedici işlər görülüb. Amma bu, bu gün ölkəmizə qarşı düşmənçilik edən hərbi-siyasi ittifaqa çevrilib. Və burada suallarımız var. Ermənistan hara gedir? Bunun nəticələri nədir? Niyə bu hərəkatı dəstəkləməliyik?"
