“Biz artıq demoqrafik böhrana doğru gedirik. Doğuş sayı 100 mindən aşağı düşüb, hardasa iki dəfə azalıb. Ciddi problemdir. Doğuş sayının azalması dövlət qarşısında strateji problem yaradır. 45 min oğlan uşağı dünyaya gəlibsə, 18-20 il sonra əsgər olmalıdırlar. Onların bir qismi xaricə köçəcək, bir qismi elmlə məşğul olacaq və s. Bəs biz əsgərliyə kimi çağıracağıq?”
1xeber.media bildirir ki, bu sözləri REAL Partiyasının sədri Natiq Cəfərli “Media Türk” Tv-yə deyib.
O bildirib ki, hazırda tətbiq edilən təqaüd sistemi də doğru deyil: “Şəxsən mən onu qəbul etmirəm. Bu gün işləyənlər təqaüdçülərin təqaüdünü ödəyir, sabah özləri təqaüdə çıxanda yeni nəsil işləyib onların təqaüdünü ödəyir. Problemlərin cəmi ondan xəbər verir ki, demoqrafik problemləri həll etmək üçün hansısa təşviq addımlarına ehtiyac var. Uşaqpulu verilsə, bu problem həll olunacaqmı? Təbii ki, yox. Avropa ölkələrində çox böyük təşviq proqramları var.
Bunlardan biri Polşadadır, hər uşağa ayda 800 zlotı verilir. Anadan olanda 10.000 zlotıya qədər bonus almaq haqqı var. Amma Polşa Avropada ən az doğuşa sahib olan ölkələrdəndir. Bu o deməkdir ki, yetərli deyil. Deməli, gənclərin mənzil problemi də həll edilməlidir, qazancları artmalıdır. İnsan yaxşı pul qazanırsa, dövlətdən yardım gözləməməlidir. İnsanlar sosial müavinətdən asılı olmadan pul qazanmalıdırlar.
Biz bunu təşviq edirik. Deputatın belə çıxışı oldu ki, uşaqpulu verilsə, kişilər tənbəlləşər. Bu, məntiqsizdir axı. Siz nə qədər uşaqpulu verməyi düşünürsünüz ki, kişi tənbəlləşsin?! Tutaq ki, evdə iki uşaq var, hər uşağa 100 manat veriləcək. 200 manatla kim dolanacaq? Bir həftəyə çatmır, 3 həftə nə edəcək? Tənbəlləşib divanda oturacaq? Ona görə də bunun çıxış yolunu tapmalıyıq”.
