Son zamanlarda bir çox erməni ekspertlər yaxın müddətdə Ermənistanın bir dövlət kimi yox olacağını iddia edirlər. Ölkənin müharibə və qarşıdurma olmadan, yanlış siyasət xətti ilə müstəqilliyi və suverenliyinin itirilmə riskinin olduğu bildirilir.
Buna bir çox səbəb göstərilir, lakin əsas məsələ əhali azlığı kimi təqdim olunur. Məlumata görə, xüsusilə 44 günlük müharibə və bir günlük antiterror əməliyyatlarından çox sayda insan ölkəni birdəfəlik tərk edib. Ermənilərin əksəriyyəti ölkədə gələcəyin olmayacağını düşünür və xarici dövlətlərə köçməyi planlayırlar.
Bəzi ekspertlərin fikrincə, Ermənistan ictimaiyyətinin narahatlıqlarından biri də Türkiyə və Azərbaycanın artan nüfuzu, türk birliyinin son zamanlarda daha çox gündəmə gəlməsidir. Həmçinin sülh müqaviləsi imzalandıqdan sonra Qərbi azərbaycanlıların geridönüş ehtimalının da erməniləri təşvişə saldığı deyilir.
2,5 milyon erməni əhalisi 200 milyonluq Türk dünyasından çəkindiyi üçün geri addım atır? Qərbi Azərbaycana qayıdış konsepsiyası bu baxımdan necə dəyərləndirilməlidir?
Politoloq Zeynal Əmrəliyev deyib ki, Ermənistanda hazırda demoqrafik vəziyyət pisdir:
“Əhalinin sayı sürətli azalır. Bu proses hələ XXI əsrin əvvəllərindən, keçmiş prezident Robert Köçəryan hakimiyyətinin ilk illərində başlamışdı. O tarixdən bu yana Ermənistandan kütləvi köç müşahidə olunur, ölkə demək olar boşalır. Xaricdə təhsil adı ilə Ermənistandan çıxan gənclər geri qayıtmaq istəmir. Çünki əmək haqqları çox aşağıdır, ölkə gün getdikcə daha da pis vəziyyətə düşür.
Baş nazir Nikol Paşinyan 2018-ci ildə hakimiyyətə gəldikdən sonra bu prosesin qarşısını almağa çalışır. Məsələ ilə bağlı tədbir məqsədi ilə planlanan sosial layihələrin icrası baş tutmadı, çünki Ermənistanın bunun üçün kifayət qədər büdcəsi yoxdur. Gedənlərin əvəzinə Suriya və Livandan ermənilərin köçürülməsinə start verilib. Hazırda yeni məskunlaşma yerlərində yaşayanların böyük əksəriyyəti məhz Yaxın Şərqdən gələn ermənilərdir”.
Politoloqun sözlərinə görə, ermənilər üçün çətin proses başlayıb:
“Buna paralel olaraq isə Türk dünyası getdikcə güclənir. Türk Dövlətlər Təşkilatının fəaliyyətini gücləndirmək üçün ardıcıl şəkildə işlər görülür. Ermənistanın manevr imkanları çox məhdudlaşıb, xüsusilə İrəvan hökumətinin yaxın müttəfiqlərindən olan ABŞ Prezidenti Co Bayden artıq hakimiyyətdən gedir. Həmçinin Fransa Prezidenti Emmanuel Makron da yol üstündədir. Beləliklə Ermənistan bir dövlət kimi var olmasının qarantı Azərbaycan və Türkiyə ilə normal münasibət quraraq dinc qonşuluq mühitində yaşamaqdır”.
Globalinfo.az
