Rusiyalı ekspert Ukrayna Silahlı Qüvvələrinin (VSU) uzaqmənzilli zərbələrdə Starlink terminallarından istifadə etmək üçün məhdudiyyətləri keçə bildiyini iddia edib.
1xeber.media xəbər verir ki, bu barədə TASS agentliyinə Kompleks Pilotsuz Sistemlər Mərkəzinin baş konstruktoru, pilotsuz aviasiya üzrə ekspert Dmitri Kuzyakin məlumat verib.
Onun sözlərinə görə, SpaceX bəzi ölkələrdə, o cümlədən Rusiyada və Çində Starlink xidmətinin fəaliyyətinə məhdudiyyətlər tətbiq edir. Lakin ekspert iddia edir ki, Ukrayna tərəfi bu məhdudiyyətləri texniki üsullarla keçməyə çalışır.
Kuzyakinin açıqlamasına görə, bunun üçün PUA-lara quraşdırılan Starlink terminallarında “rəqəmsal şunt” adlandırdığı qurğulardan istifadə olunur və bu vasitə terminalın real koordinatlarını dəyişdirərək sistemə yanlış məlumat ötürə bilər.
Ekspert bildirib ki, onun rəhbərlik etdiyi mərkəzin əlində Starlink terminalları ilə təchiz olunmuş onlarla Ukrayna PUA-sı olduğu və onların idarəetmə platalarında koordinatların dəyişdirilməsi ilə bağlı elementlərin aşkar edildiyi iddia olunur.
Qeyd edək ki, bu məlumatlar Rusiya tərəfinin ekspert açıqlamasına əsaslanır. SpaceX və Ukrayna tərəfi ilə bağlı bu iddialara dair müstəqil təsdiqlənmiş məlumat təqdim edilməyib.
