1xeber.media xəbər verir ki, Rusiya Prezidenti Vladimir Putin ABŞ Prezidenti Donald Tramp və Çin lideri Si Cinpinə gələn ay üçtərəfli görüş keçirməyi və Ukraynadakı münaqişənin həlli yollarını müzakirə etməyi təklif edib. Bu barədə “The Wall Street Journal” (WSJ) məlumat yayıb.
Nəşrin Rusiya kəşfiyyatının keçmiş əməkdaşına istinadən yaydığı məlumata görə, Putin bu ideyanı oktyabrın 9-da Tramp ilə telefon danışığı zamanı irəli sürüb.
Mümkün görüşün noyabrın 18–19-da Çinin Şençjen şəhərində keçirilməsi planlaşdırılan Asiya-Sakit Okean İqtisadi Əməkdaşlıq Təşkilatının (APEC) sammiti çərçivəsində təşkili nəzərdən keçirilir.
Rusiya prezidentinin mətbuat katibi Dmitri Peskov mümkün görüşlə bağlı müzakirələrin aparıldığını təsdiqləyib. Bununla belə, onun sözlərinə görə, görüşün keçirilməsi və gündəliyi barədə hələlik dəqiq razılaşma yoxdur.
WSJ-nin məlumatına əsasən, ABŞ tərəfi görüşdə iştirakla bağlı hələ yekun qərar verməyib. Ehtimal olunan formatda Ukrayna Prezidenti Volodimir Zelenskinin iştirakı nəzərdə tutulmur.
Nəşr qeyd edir ki, belə bir görüşün keçirilməsi Moskvanın Ukrayna münaqişəsinin həlli ilə bağlı danışıqlarda mövqeyini gücləndirmək cəhdi kimi qiymətləndirilir. Lakin üçtərəfli sammitin baş tutacağı hələ rəsmən təsdiqlənməyib.
