Rusiya Prezidenti Vladimir Putin, ABŞ Prezidenti Donald Tramp və Çin Sədri Si Cinpin arasında keçiriləcək üçtərəfli görüş Avropa İttifaqında ciddi narahatlığa səbəb olub.
1xeber.media “Politico”ya istinadən xəbər verir ki, Avropa rəsmiləri üç liderin Avropanın iştirakı olmadan regionun gələcək təhlükəsizlik sistemi ilə bağlı müzakirələr aparacağından və qərarlar qəbul edə biləcəyindən ehtiyat edirlər.
Nəşrin yazdığına görə, Trampın həftənin sonunda Putin və Si Cinpinlə şəxsən görüşməsi Avropa İttifaqı rəsmilərinin narahatlığını daha da artırıb.
Mənbələrdən biri bildirib ki, Avropa rəsmiləri Vaşinqtonun Ukrayna münaqişəsinin nizamlanması ilə bağlı əsl niyyətlərinə də şübhə ilə yanaşırlar.
Onun sözlərinə görə, Avropada ABŞ-ın danışıqlarda iştirakının nəticədə Ukraynaya deyil, Rusiyaya təzyiq göstərilməsi ilə müşayiət olunmasını istəyirlər.
Bundan əvvəl “Axios” portalı da Putin, Tramp və Si Cinpin arasında gözlənilən görüşün ABŞ-ın müttəfiqləri arasında narahatlıq yaratdığını yazmışdı.
Nəşrin məlumatına görə, üçtərəfli sammitdən sonra veriləcək bəyanatların və əldə olunacaq razılaşmaların gözlənilməz ola biləcəyi Vaşinqtonun müttəfiqlərini ehtiyatlandırır.
Beləliklə, üç böyük dövlətin liderləri arasında gözlənilən danışıqlar təkcə beynəlxalq münasibətlər deyil, həm də Avropanın gələcək təhlükəsizlik arxitekturası baxımından diqqət mərkəzindədir.
















