İranın Azərbaycandakı müvəqqəti işlər vəkilindən sonra Rusiya səfirinin də Xarici İşlər Nazirliyinə çağırılma məsələsi gündəmə gəlib. Ekspertlər iddia edir ki, İrandakı rəsmi dairələrə bağlı qruplar kimi Rusiya hakimiyyətinə bağlı Z-blogerlər də (Rusiyanın Ukraynaya qarşı işğalçı müharibəsini dəstəkləyənlər) Azərbaycan və dövlət başçısı İlham Əliyev əleyhinə qara təbliğata başlayıblar.Belə ki, Kreml İlham Əliyevin Rusiyadan kompensasiya və təyyarənin vurulmasına görə cinayətkarların müəyyənləşdirilməsi tələbini yerinə yetirmək əvəzinə Azərbaycanı hədəf seçən Z-blogerləri “irəli” çəkib. “Azərbaycan Ukraynaya dəstək verir”, “Təyyarənin vurulmasına görə Ukrayna günahkardır”, “İkinci Qarabağ müharibəsi zamanı rusiyalı sülhməramlılara atəş açılmışdı” kimi həqiqəti əks etdirməyən bəhanələr gətirirlər.
Politoloq Aytən Qurbanova deyib ki, məqsəd əsas mövzudan yayınmaqdır:
“İranda Azərbaycanı hədəf seçənlər hakimiyyətin mühafizəkar qruplarına aid olduğu kimi, Rusiyadakı Z-blogerlər də Moskvada informasiya siyasətini müəyyənləşdirən rəsmi strukturlara aiddir. Rəsmi Tehrana və Moskvaya bağlı mərkəzlərin Azərbaycana və dövlət başçımıza münasibətdə əsassız ittihamlara söykənən qara kampaniyası əslində onların cənab İlham Əliyevin qətiyyətli mövqeyinin qarşısındakı gücsüzlüyünün bariz nümunəsidir. Hər iki dövlət rəsmiləri çox gözəl bilirlər ki, Azərbaycanın haqq mübarizəsində milli maraqlarımızı və təhlükəsiziyimizi hədəf alan heç bir addım cavabsız qalmayacaq.
Eləcə də AZAL-a məxsus təyyarənin Rusiya tərəfindən vurulması faktı dövlət başçımız tərəfindən açıq şəkildə ifadə edilib və bu istiqamətdə Rusiya qarşısında qoyulmuş tələblər də konkret şəkildə bildirilib. Belə ki, Rusiya tərəfindən təyyarənin qəsdən vurulmasa da günahkarlar mütləq cəzalandırılmalıdır. Həmçinin həyatını itirmiş ekipaj üzvlərinin və sərnişinlərin ailələrinə, xəsarət alanlara təzminat ödənilməlidir. Bu tələblərin hər biri beynəlxalq hüquqa, ədalətə və analoji təcrübəyə əsaslanır. Ona görə də, Z-blogerlərin vasitəsilə ortaya atılmış absurd və reallıqdan uzaq iddialar heç bir əhəmiyyət kəsb etmədiyi kimi, ikitərəfli münasibətlərə mənfi təsir göstərəcək amillər ola bilər”.
globalinfo.az
