Bakıda gənc oğlanı bıçaqlayaraq qətlə yetirməkdə təqsirləndirilən Elşən Nəbiyevin cinayət işi üzrə məhkəməsi davam etdirilib.
1xeber.media məlumatına görə, Bakı Ağır Cinayətlər Məhkəməsinin hakimi Roman Ələkbərlinin sədrliyi ilə keçirilən prosesdə təqsirləndirilən şəxs ifadə verib:
"Mən ona yaxınlaşanda nalayiq sözlər işlətməyə başladı. Mənə bir az borcu var idi. Onunla üzbəüz 30-35 saniyə dayanmışıq. Mənim ona əlim dəyməyib, mən verilmiş ittihamı qəbul etmirəm. Vurandan sonra apardıq xəstəxanaya, orada cibimdə 300 manat pul var idi, dedim qurban olum bunu verim, insanı xilas edin, ancaq mümkün olmadı".
Məhkəmə prosesi 27 yanvar tarixinə kimi təxirə salınıb.
Xatırladaq ki, ötən proseslərdə şahid qismində ifadə verən zərərçəkmiş şəxsin - mərhumun hüquqi varisi Yusif Əliyev hadisəni səhər saatlarında eşitdiyini deyib:
"Etibar Əliyev mənim oğlumdur. Səhər 5-də eşitdim ki, məlum hadisə baş verib. Hadisəni mənə qonşum xəbər verdi. Birbaşa xəstəxanaya getdim. Oğlumla təqsirləndirilən şəxslə hərhansı bir ədavətin olması ilə bağlı heç bir məlumatım yox idi".
Digər şahid Nicat Bəhrəmov isə bildirib ki, təqsirləndirilən şəxsi yaxından tanıyıb:
"Nəsimi rayon Polis İdarəsinin 21-ci Polis Bölməsinin sahə rəisi olaraq çalışıram. Nərimanov rayonunda bizim ailəyə məxsus avtoyuma mərkəzi var idi. Etibar onu məndən icarəyə götürüb işlədirdi. Etibarı yaxından tanıyıram. Polis orqanlarında çalışdığı üçün tanıyırdım. Sonra gördüm ki, icarə haqqını ödəyə bilmir, bağladım. Mənə bir nəfər dedi ki, Elşən adlı şəxs avtoyumanı götürmək istəyir. Ancaq sonradan ondan xəbər çıxmadı. Mən o ərazidən çıxdıqdan sonra eşitdim ki, Elşən orda kafe götürüb işlədir. Həmkarlarımdan eşitdim ki Elşən Etibarı bıçaqla vuraraq qətlə yetirib".
Şahid Vüsalə Həsənova qeyd edib ki, tərəflər arasında mübahisə borc üstündə düşüb:
"Mən Elşənin kafesinin böyründəki kafedə ofisiant olaraq çalışırdım. Axşamlar isə çox vaxt Elşənin kafesinə gedib dostlarla yeyib içirdik. Həmin gün ora gedəndə Elşən mənim masama yaxınlaşdı və sifarişimi verdim. Yemək yeyib araq içdik. Sonradan Etibarla Elşən arasında dava düşdü. Onların hər ikisi içkili idi. Mən sonra səhər açılırdı deyə taksi sifarişi verib gedəndə gördüm ki, onlar mübahisə edə-edə kafenin yaxınlığında olan avtoyuma məntəqəsinə tərəf getdilər. Mən orda olanda söyüşlü mübahisə edirdilər. Sonra Elşən mənə yığdı ki, Etibarı bıçaqla vurmuşam. Ora gələndə gördüm ki, Etibar kürəyi üstə uzanıb. Etibarda bıçaq yarası görsəm də qan görmədim. Bıçaqda qan izi yox idi və onu sumkama qoydum".
Qeyd edək ki, hadisə 2023-cü ilin dekabrında paytaxtın Nərimanov rayonu ərazisində qeydə alınıb. Araşdırmalarla məlum olub ki, 1975-ci il təvəllüdlü Elşən Nəbiyev şəxsi münasibətlər zəminində 1990-cı il təvəllüdlü Etibar Əliyevi bıçaqlayaraq öldürülməsinə əsaslı şübhələr müəyyən edilib.
Cinayət əməlini törətməkdə şübhəli bilinən Elşən Nəbiyev Firudun oğlu polis əməkdaşları tərəfindən keçirilən tədbirlərlə saxlanılıb. Ona qarşı Cinayət Məcəlləsinin 120.1-ci (qəsdən adam öldürmə) maddəsi ilə ittiham irəli sürülüb.
