Daxili İşlər Nazirliyinin Hava Nəqliyyatında Polis İdarəsinin keçmiş rəis müavini, polkovnik Rasim İldırımzadə, Dünya Azərbaycanlıları İctimai Maarif Mərkəzinin rəhbəri Zaur Mirzəzadə və Balakən rayonu dairə seçki komissiyasının katibi Qoşqar Məmmədovun cinayət işi üzrə məhkəmə prosesi keçirilib.
1xeber.media Teleqraf.com-a istinadən xəbər verir ki, Bakı Ağır Cinayətlər Məhkəməsində hakim Fəxri Məmmədovun sədrliyi ilə keçirilən prosesdə təqsirləndirilən şəxslərin vəkilləri və zərərçəkmiş Qurban Piriyevin vəkili Sadiq Rəsulovun verdikləri vəsatətlər müzakirə olunub.
Qeyd edək ki, ötən məhkəmə iclasında zərərçəkmiş Qurban Piriyevin vəkili Sadiq Rəsulov vəsatətlə çıxış edib. O, təqsirləndirilən şəxslərin hər birinin barəsində həbs qətimkan tədbirinin seçilməsini istəyib. Vəkil vəsatətini belə əsaslandırıb ki, təqsirləndirilən şəxslərin məhkəmədən yayınmaq, məhkəmə iclaslarına gəlməmək ehtimalı var. Vəkil hesab edib ki, təqsirləndirilən şəxslər zərərçəkmiş şəxsə dəymiş ziyanı ödəmək fikirləri yoxdur:
"Onların ziyanı ödəmək fikirləri olsaydı, bunu vaxtında edərdilər. Ziyanı ödəməkdən yayınırlar. Azadlıqda qalmaları onların yeni cinayətlər törətmələrinə imkan yaradır. Bizdə məlumat var ki, digər cinayət işləri üzrə hazırda istintaqı aparılan işlərdə Rasim İldırımzadənin adı keçir. Bu da onu deməyə əsas verir ki, qanunsuz əməllərinə davam edir", - deyə Sadiq Rəsulov qeyd edib.
Vəkil həmçinin deyib ki, təqsirləndirilən şəxslər zərərçəkmişə dəymiş ziyanın böyük hissəsini ödəməyib. Vəkil qaldırdığı vəsatətin təmin edilməsini istəyib.
Bundan əlavə, Rasim İldırımzadənin vəkili Cahangir Şükürov da vəsatət verib. Qeyd edib ki, ibtidai araşdırmada qanun pozuntusuna yol verilib, buna görə işin ibtidai istintaqa qaytarılmasını istəyir. Vəkil qeyd edib ki, həm onun özünün, həm də müvəkkilinin imzaları iş materiallarında saxtalaşdırılıb.
Digər təqsirləndirilən Qoşqar Məmmədovun vəkili Nurlan Məmmədov Cinayət-Prosessual Məcəlləsinin 303-cü maddəsinə əsasən işin ibtidai istintaqa qaytarılmasını istəyib. Nurlan Məmmədov hesab edir ki, cinayət işinin başlanmasına xitam verilməlidir. Qeyd edib ki, şikayət edən şəxsin ərizəsi yoxdur, iş materiallarına cinayət işinin başlanması barədə qərar daxil edilməyib.
Vəkil əlavə edib ki, Qoşqar Məmmədov ibtidai istintaq zamanı işi araşdıran müstəntiq Kamran Əliyevə etiraz edib, amma etiraz təmin olunmayıb.
Zərərçəkmiş şəxsin nümayəndəsinin təqsirləndirilən şəxslər barəsində həbs qətimkan tədbirinin seçilməsi ilə bağlı vəsatətinə münasibət bildirən Nurlan Məmmədov bunun üçün heç bir əsas olmadığını deyib.
Vəsatətlərin müzakirə olunması zamanı Cahangir Şükürov bildirib ki, müvəkkili ilkin istintaq zamanı qanunsuz olaraq saxlanılıb: "İttiham aktı Cinayət-Prosessual Məcəlləsinin 289-cu maddəsinin tələbləri kobud şəkildə pozularaq hazırlanıb. Müstəntiq iş materiallarında olan protokolda həm müdafiə etdiyim şəxsin, həm də mənim imzamı saxtalaşdırıb. İşin əlavə istintaq hərəkətləri aparılması üçün cinayət işinin ibtidai istintaqa qaytarılmasını istəyirik".
Təqsirləndirilən şəxslər vəkilləri ilə razı olduqlarını qeyd ediblər.
Vəsatətlərə münasibət bildirən dövlət ittihamçısı bildirib ki, vəkillərin vəsatətlərin təmin olunması üçün əsaslar yoxdur. Həkimlər vəsatətləri təmin etməyib.
Prosesdə dövlət ittihamçısı təqsirləndirilən şəxslərin barəsində olan ittiham aktını elan edib.
Hakim təqsirləndirilən şəxslərə ittihamın mahiyyətini, həmçinin onların hüquqlarını izah edib. Bildirib ki, təqsirləndirilən şəxslərin əməlləri məhkəmədə sübuta yetirilsə, onların 10 ildən 14 ilədək azadlıqdan məhrum ediləcəyi gözlənilir.
İttihama münasibət bildirən təqsirləndirilən şəxslər özlərini təqsirli bilməyiblər.
Hazırda Rasim İldırımzadə və Qoşqar Məmmədov ifadə verməkdən imtina ediblər. Zaur Mirzəzadə isə hazırda səhhətinin ifadə verməyə yol vermədiyini deyib.
Daha sonra hakimlər zərərçəkmiş şəxsin dindirilməsini barədə qərar qəbul ediblər. Zərərçəkmiş Qurban Piriyevin prosesdə iştirak etmədiyi məlum olub.
Hakimlər zərərçəkmişin növbəti iclasda dindirilməsinin təmin olunması barədə qərar qəbul ediblər.
Növbəti proses yanvarın 28-dğ davam edəcək.
İstintaq sənədlərinə görə, Rasim İldırımzadə həbsindən əvvəl istintaqdan yayındığı üçün axtarışda olub. Tutulduqdan sonra isə məhkəmənin qərarı ilə Rasim İldırımzadə, ondan başqa Zaur Mirzəzadə və Qoşqar Məmmədov məhkəmənin qərarı ilə həbs ediliblər. İstintaqın gedişində onlar ev dustaqlığına buraxılıblar, daha sonra isə barələrində “başqa yerə getməmək” haqda qətimkan tədbiri seçilib.
Onların əməlindən ziyan çəkən iş adamı Piriyev Qurban Zeynəddin oğludur. Qurban əvvəllər dövlət orqanlarında müxtəlif vəzifələrdə işləyib. Onu aldadan şəxslərlə tanış edən isə tanışı - Balakən rayon sakini Hürü Əmiraslanovadır.
Hürü Əmiraslanova özü də bu işə görə cinayət məsuliyyyətinə cəlb edilib. Amma istintaqın gedişində vəfat etdiyi üçün cinayət işinə bəraətverici əsaslar olmadan xitam verilib.
İttihama görə, təqsirləndirilən şəxslər Qurban Piriyevi Bakı şəhərinin rayonlarından birinə icra başçısı təyin olunacağı vədi ilə aldadıblar. Cinayətin əsas təşkilatçısı isə Rasim İldırımzadədir. O, qurduğu planla zərərçəkmiş şəxsi inandıra bilib. Rasim İldırımzadə qrupun digər üzvü Qoşqar Məmmədovu yalandan Prezident Administrasiyasında işləyən yüksək vəzifəli şəxs kimi təqdim edib, onun bütün məsələləri həll edəcəyini deyib. Zaur Mirzəzadəni isə sözügedən yerdə guya Nihat adlı mötəbər vəzifədə çalışan şəxs kimi təqdim edib.
İşi düzüb-qoşanların nüfuzlu şəxslər olduğuna inanan Qurban Piriyev icra başçısı keçmək üçün Rasim İldırımzadənin adamlarına bir neçə dəfəyə 510 min manat pul, 34 min manatlıq qızıl-zinət əşyaları verib.
Sonradan aldanıldığını bilən zərərçəkmiş polisə şikayət edib. İlkin istintaq dövründə ona dəymiş 544 min manat ziyanın 85 min manatı Rasim İldırımzadə, 20 min manatı isə Zaur Mirzəzadə və Qoşqar Məmmədov tərəfindən geri qaytarılıb.
Qeyd edək ki, Rasim İldırımzadənin bir qardaşı Xətai rayonunun keçmiş prokuroru Yusif İldırımzadə, digəri isə ləğv olunmuş “Amrahbank”ın təsisçisi Yunus İldırımzadədir.
