Çoxdandır ictimai-siyasi aktivliyi müşahidə olunmayan Müasir Müsavat Partiyasının sədri Hafiz Hacıyevin bir sıra xəstəliklərdən əziyyət çəkdiyi barədə məlumat yayılıb. Məsələn, sosial şəbəkələrdə iddia olunur ki, Hafiz Hacıyev altsheymer (yaddaş pozğunluğu), enirez (sidik qaçırma), prostat adenoması kimi xəstəliklərdən müalicə olunur. Hətta onun infarkt olduğunu söyləyənlər də var.
1xeber.media xəbər verir ki, modern.az-ın əməkdaşı iddiaların nə dərəcədə həqiqət olduğunu dəqiqləşdirmək üçün Hafiz Hacıyevin özü ilə əlaqə saxlayıb.
Müasir Müsavat Partiyasının sədri altsheymer və yuxarıda adı çəkilən digər xəstəliklərə tutulduğu barədə iddiaları rədd edib:
"Yaddaşım-filan yerindədir və çox da əladır. 15 yaşında cavan oğlan kimiyik".
Bununla belə Hafiz Hacıyev müalicə olunduğunu gizlətməyib.
O, ürəyindən əməliyyat olunduğunu qeyd edib.
"İndi səhhətim müalicədən sonra çox yaxşıdır. Mübarizəyə başlamışam. Bələdiyyə seçkilərinə 25 namizəd irəli sürmüşük. Partiyamızın iclası gözlənilir. Çox böyük inadla Azərbaycanın yenidən qurulması istiqamətində böyük işlər görəcəyik. Ürəyimlə bağlı problemim vardı, damarlarıma stent qoydurmuşam. O da elə materialdandı ki, sıradan çıxası deyil. Rüşvətxorlar, korrupsionerlər və dövlətə xəyanət edənlər varsa, qoy onlar narahat olsunlar ki, bizimlə mübarizəyə necə davam gətirəcəklər...".
