"Beynəlxalq Bankın (ABB) blokladığı kartdan vəsaitin oğurlanması haqda dünənki yazımdan sonra mənə çoxsaylı müraciətlər edilir".
1xeber.media xəbər verir ki, bu barədə hüquqşünas Əkrəm Həsənov "Facebook" səhifəsində paylaşım edib.
"Sən demə, ABB-də bundan da biabırçı hallar var. Məsələn, həm vətəndaşların, həm də şirkətlərin hesabından (kartından) vəsaitlər onlar tərəfindən heç bir hərəkət edilmədikdə belə də silinir. Hətta müqaviləyə əsasən onlara SMS-lə OTP (birdəfəlik parol) gəlməli olduğu halda da OTP gəlmir (və ya gəlir, amma müştəri onu heç kəsə vermir, banka zəng vurur, lakin bank tədbir görmür), amma vəsait silinir. Sonra da ABB chargeback (vəsaitin qaytarılması) üçün müştəridən əlavə xidmət haqqı istəyir! Deməyə sözüm yoxdur sadəcə!
Bütün bu biabırçılıqlar bir tərəfə, məni indi başqa sual maraqlandırır. İstənilən bankımıza xaricə pul köçürmək üçün gedəndə bizdən topa-topa təsdiqedici sənədlər istəyirlər: Kimə köçürürsən, müqaviləni göstər və s. Bəs necə olur ki, kartımızdan oğurlanan vəsait haqda arsız-arsız bizə deyirlər ki, pul xaricə köçürülüb, heç nə edə bilmərik?", - deyə Ə.Həsənov qeyd edib.
