Tarix və baş verən hadisələr sübut edir ki, dövlətlərin irəliləməsində və ya geriləməsində əhəmiyyətli rola malik amil məhz liderdir. Əhəmiyyətli digər məsələ də odur ki, rəhbər hər zaman və hər şəraitdə necə ünsiyyət qurmalı olduğuna diqqət yetirməlidir. Şifahi ünsiyyət, sadəcə, sadə danışmaq deyil, sözləri necə seçmək, eləcə də davranış, bəzən isə sözlərin yerinə jest və mimikaların da danışması baxımından görünən qeyri-verbal ünsiyyətə də diqqət yetirilməlidir. Bu, liderin təsviri keyfiyyətidir. Yürüdülən siyasətin keyfiyyəti isə müsahibə zamanı məzmuna diqqətlə nəzər yetirdiyin, onu analiz etdiyin zaman anlaşılır. Belə ki, bu keyfiyyət səbəb-nəticə əlaqəsinin özünü doğrultmasına, qazandırdığı dividentlərə görə bəlli olur. Vurğulanmalı prioritet məsələ odur ki, Azərbaycan Prezidenti İlham Əliyevin yerli telekanallara müsahibəsi mesajı göndərən və qəbul edənlər arasında qarşılıqlı anlaşma olduğundan bir daha xəbər verdi. Yəni, "Mən də bilirəm ki, arxamda Azərbaycan xalqı dayanır" fikri xudbin insanların və bədbin fikirlərin dövriyyəyə buraxılmağa cəhd edildiyi bir zamanda möhkəm qalxan oldu.
Bu fikirləri AZƏRTAC-a açıqlamasında siyasi elmlər üzrə fəlsəfə doktoru, politoloq Şəbnəm Həsənova söyləyib.
Politoloq qeyd edib ki, müsahibə həm də empirik məlumat kimi qəbul olundu. Dövlətimizin başçımızın D-8-ə üzvlük üçün illərlə aparılan ardıcıl siyasəti vurğulaması, bundan sonra təşkilat çərçivəsində fəal siyasətin yürüdüləcəyi, müsəlman rəhbərlərin təşkilatlarda dəstəklənəcəyi fikirlərinin səsləndirilməsi Azərbaycanın qlobal siyasi arenaya çoxdan çıxdığından xəbər verir. Dünya liderləri də qəbul edirlər ki, qlobal siyasətdə məhz Prezident İlham Əliyev kimi görkəmli diplomata zərurət var. Dövlətimizin başçısının müsahibəsi həm də reallığı üzə çıxaran, onu yaradan qüvvədir. Ona görədir ki, Prezident İlham Əliyev Qərb siyasətini tənqid edərkən heç nəyə və heç kimə deyil, məhz supergücün liderinin Qərb siyasətini tənqid etməsinə, Qərbin deqradasiyasına diqqəti çəkir. Müsahibə kənar sosial qüvvələri üzə çıxarmaq üsulu baxımından da son dərəcə önəmli idi. Buna görədir ki, dövlətimizin başçısı Qərb təşkilatlarını azərbaycanlı gənclərin beynini yumasında haqlı olaraq ittiham edir, onları əsas günahkar kimi görür. Odur ki, kənar meyillərin cəmiyyətə sızmasının sərhədlərini aşkar etmək üçün əlavə səylər göstərilməlidir. Bu, bizim birgə səylərimiz, ümummilli məsələmiz olmalıdır.
“Müsahibə zamanı Ermənistanın, Fransanın pozucu əməllərinin nəticəsi olaraq Cənubi Qafqazdan sülhün bilərəkdən uzaqlaşdırıldığı, sadəcə, Azərbaycana, Ermənistana və regiona deyil, bütövlükdə bütün dünyaya bir daha məlum oldu. Hər halda, tarixdə ilk dəfə olaraq Amerika, Avropa İttifaqı və Ermənistan olmaqla çox qəribə bir əməkdaşlıq platformasının yaradılması hər sualın cavabı, müəmmanın, pozucu cəhdin mövcudluğunun əsasıdır. Müsahibə bir daha Azərbaycanın konstruktiv siyasətini, dövlətimizin başçısının əməkdaşlığa açıq olduğunu göstərdisə, digər tərəfdən də bir Lider kimi təvazökarlıq, dürüstlük və ən əsası, heç nədən və heç kimdən çəkinmədən haqlı mühakimə yürütmək qabiliyyətinə malik olduğunu nümayiş etdirdi. Azərbaycan artıq hər şeyi və hər kəsi öz adı ilə çağırma gücünə, reallığına və iradəsinə malikdir. Bunu yaradan isə Müzəffər Liderimizdir”, - deyə Ş.Həsənova vurğulayıb.
