İtaliyanın mənzərəli şəhərlərindən olan Komo həm də mədəniyyət və incəsənət mərkəzi kimi məşhurdur.
İmperatorluq dövrünün izlərini daşıyan bu şəhərdə teatrın, rəssamlığın və klassik musiqinin inkişafına böyük önəm verilib.
Musiqidən söz düşmüşkən, İtaliyanı bütün dünyada məşhur edən opera sənəti Komodan da yan keçməyib. Bu şəhərdəki "Teatro Sociale di Como"da məşhur vokalist, soprano Eleonora Burattonun fortepianoçı Davide Cavalli ilə birgə etdiyi “Kəpənək Qala” konserti ziyarətçilər arasında sevilir. Gecənin aparıcısı məşhur italyan müğənnisi, komediyaçı, aktyor və musiqiçi Elio ləqəbli Stefano Belisaridir.
Yeri gəlmişkən, teatrın binasını 1813-cü ildə memar Cüzeppe Kusi neo-qotik üslubda tikib, bina 1855-ci ildə genişləndirilib. 1980-ci illərin ortalarında isə burada genişmiqyaslı yenidənqurma işləri aparılıb, nəticədə 900 yerlik bina, kütləvi sütunlu beş pilləli və strukturun monumental neoklassik fasadı tikilib. Teatr Komoya istirahətə gələnlər üçün mədəni əyləncə yerinə çevrilib.
Komo həm də möhtəşəm malikanələri ilə tanınır. Həmin villalara ancaq qayıqlarla getmək olur. Bunlardan biri olan "Villa d`Este" Komo gölünün cənub-qərbində, Çernobbio şəhərciyində yerləşir. Əfsanəvi otel XVI əsrdə inşa olunub və 1873-cü ilə qədər kardinal Tolomeo Qallionun üçüncü iqamətgahı olub. Burada müxtəlif vaxtlarda Belçika kralı Leopold, Hollandiya kraliçası Beatriks, bəstəkar Cüzeppe Verdi, kinorejissor və produser Alfred Hiçkok, musiqiçi Pol Makkartni, aktyor Arnold Şvartsnegger və modelyer İv Sen-Loran bu oteldə qonaq olublar.
Çernobbioda keçmiş Santa-Mariya Assunta di Çernobbio monastırının yerində (onun haqqında ilk qeydlər XV əsrə aiddir) daha bir məşhur malikanə - Villa Erba yerləşir. Onu əczaçılıq maqnatı Luici Erba inşa etdirib, sonradan malikanə onun xələflərinə qalıb, Bunlardan biri məşhur rejissor Lukino Viskontidir. 2004-cü ildə isə bu villa “Ouşenin on iki dostu” filmi üçün çəkiliş meydanına çevrilib.
"Gucci evi" filminin çəkildiyi yer “Villa Balbiano” villası isə Komo gölünün qərbində yerləşir. Malikanə 16-cı əsrin sonunda onu tikdirmiş və əsas iqamətgahı kimi istifadə edən məşhur kardinal Tolomeo Qallionun adı bağlı müstəsna tarixi saraydır. Bir əsr sonra villanı kardinal Angelo Maria Durini genişləndirib. Məqsəd burada festivallar, ziyafətlər və rəqs gecələri təşkil etmək olub. Villada altı dəbdəbəli otaq var. Hər otağı məşhur interyer-dekorator Jak Qarsiya xüsusi dizayn edib. Ətrafda heykəllər və fəvvarələr var.
Komoda geniş istifadə edilən qayıqlar tarixən ən işlək nəqliyyat vasitəsi olub. Onlarla bu şəhərə qida çatdırıblar. Bir neçə əsr bundan əvvəl dünyanın ən yaxşı ustaları Komoya toplaşaraq dünyanın yaxşı qayıqlarını düzəldiblər və şəhəri bir növ qayıqların vətəninə çeviriblər. Bu həm də Komoya gələn zadəgan nəslinin nümayəndələri üçün bir əyləncə vasitəsi idi.
Komodakı “Museo della Barca Lariana" Avropanın ən möhtəşəm qayıq muzeylərindən biridir. Muzey 1982-ci ildə 19-cu əsrdən qalma iplik fabrikində yaradılıb və Komo gölündə gəmiçiliyin tarixinə həsr olunub. Buranı ziyarət etmək istəyənlər 6 avrodan keçməlidir. Muzeyin kolleksiyasına yüzlərlə tarixi qayıq, o cümlədən avarçəkənlər, qandolalar, balıqçılıq, ovçuluq və qaçaqmalçılıq qayıqları, daxili və xarici motorlu qayıqlar, sərnişin daşınması üçün buxar qayıqları, üç nöqtəli hidroplanlar və yarış katamaranları, yelkənli qayıqlar və keçmiş günlərin işçi qayıqları daxildir.
Komoda 1970-ci illərdən başlayaraq ənənəvi taxta qayıqlardan istifadə sürətlə azalıb. Çox vaxt onlar limanlarda və yaxud evlərin yaxınlığında tərk edilir, odun və yaxud tikinti materialları əldə etmək üçün sökülürdü. Yalnız keçmiş dövrün həvəskarları olan şəxslər ən maraqlı nümunələri alıb və bərpa edib.
