Keçən həftəsonu Buenos-Ayresdə güclü fırtınalar səbəbindən bir neçə bölgədə dəhşətli nəticələrə yol açan faciəvi vəziyyət yaranıb. Cümə günü səhər tezdən başlayan leysan yağışlar şənbə günü axşama qədər davam edib.
1xeber.media xəbər verir ki, hökumətin rəsmi məlumatına görə, Buenos-Ayresin müxtəlif rayonlarından 4 mindən çox sakin təxliyə olunub. Hakimiyyət orqanları Silahlı Qüvvələri bu işlərə cəlb edib, 30-dan çox bələdiyyə təbii fəlakətdən zərər görüb.
Yağış barədə xəbərdarlıq edilsə də, Buenos-Ayres vilayətinin sakinləri bölgədə ilin bu fəslində son 40 ilin ən güclü fırtınasının baş verəcəyini gözləməyiblər. Cəmi bir gün ərzində aylıq normadan çox yağıntı düşüb.
Son 24 saat ərzində Argentinanın bu vilayətində 400 millimetr yağıntı qeydə alınıb. Fəlakətin episentri Buenos-Ayresin şimal və qərbində yerləşən Arresifes, Kampana, Salto və Sarate rayonları olub. Bu bölgədə bir neçə yol və körpü bağlanıb, mülki müdafiə orqanları vəziyyətin ağırlığını nəzərə alaraq insanlara bu ərazidə səyahət etməməyi ciddi şəkildə tövsiyə ediblər.
Kilsələr, klublar və məktəblər tez bir zamanda müvəqqəti təxliyə mərkəzlərinə çevrilib və orada artıq bütün əmlakını itirmiş 4 mindən çox insan təbii fəlakətdən sığınacaq tapıb. Bu arada, şənbə günü günorta saatlarında içində uşaqlar olan azı üç avtobus sel suları səbəbindən doqquz saatdan artıq yolda qalaraq hərəkət edə bilməyib.
