"Putin Trampın zəif nöqtəsini yaxşı bilir və belədə onu təmin edib, öz tərəfinə çəkir".
Bunu Qaynarinfo-ya açıqlamasında politoloq Qabil Hüseynli ABŞ prezidenti Donald Trampın Ukrayna məsələsində Rusiyaya yumşaq münasibət sərgiləməsinin səbəblərindən danışarkən deyib.
Qabil Hüseynlinin sözlərinə görə, məlum olan odur ki, vaxtilə Tramp Rusiya KQB-nin agenti olub:
"Bunu sübut edən onun rus hərbi geyimində fotoşəkilləri və digər məlumatlardır ki, bu məslələr Senatda da səsləndirilib. İndi də o prezident olaraq bu xidməti vəzifəsini yerinə yetirməkdədir. İkinci məqam Rusiya prezidenti Vladimir Putinin Qərb ölkələrinin liderlərini rüşvətlə ələ almaq qabiliyyətilə bağlıdır. Putin Trampla ilk telefon danışığında ona Şimal Buzlu okeanını, Rusiyanın neft-qaz sərvətləri üzərində nəzarəti vəd edib. Tramp isə göründüyü kimi, hədsiz var-dövlətə sahib olmasına baxmayaraq, daha yeni-yeni sərvətlər əldə etməkdə maraqlıdır. Yəni belə məsələlər gündəmə gələndə o, əvvəlki müttəfiqlərini ataraq, çox asanlıqla qarşı tərəfə meyl edir. Trampın bu hərəkəti Qərb ideyalarına xəyanətdir. Onun əsas məqsədi gəlirlərini artırmaqdır. Putin də onun bu zəif nöqtəsini yaxşı bilir və belədə onu təmin edib, öz tərəfinə çəkir".
Qeyd edək ki, "The Washington Post"un məlumatına görə, Trampın Rusiyanı atəşkəsə razı olmağa məcbur etməməsi, ona işarədir ki, o müharibəni dayandırmaq yolunda danışıqlardan uzaqlaşa bilər. Prezident Tramp və komandası tərəfindən son həftələr gələn siqnallar nəşrin iddiasına görə, məhz buna işarədir. Hətta bildirilir ki, Tramp danışıqların pozulmasına görə Rusiyaya qarşı sanksiyalar tətbiq etməkdə də maraqlı deyil. Çünki onun əsas məqsədi amerika biznesinin inkişafına nail olmaqdır.
Trampın Rusiyaya münasibətdə yumşaq mövqeyi Avropada kəskin etiraza səbəb olub. Almaniyanın müdafiə naziri Boris Pistorius deyib ki, Trampla Putinin telefon danışığı uğursuzluğa düçar olub. Avropa Trampdan fərqli olaraq Rusiyaya qarşı təzyiqlərin gücləndirilməsini istəyir ki, Moskva sülhə meyilli olsun. Bir sözlə, Tramp müttəfiqləri ilə müqayisədə Rusiyaya daha yaxın olması ilə seçilir.
