ABŞ-ın Arizona ştatında yaşayan 50 yaşlı Kristina Çepmen Şimali koreyalı hakerlərin böyük bir kiberdələduzluq sxemini idarə etməsinə yardım etdiyi üçün 102 ay (təxminən 8,5 il) müddətinə azadlıqdan məhrum edilib.
1xeber.media xəbər verir ki, onlar çox sayda amerikalının şəxsiyyət məlumatlarından istifadə edilərək "Nike" da daxil olmaqla 300-dən çox ABŞ şirkətində saxta uzaqdan iş yerləri yaradıb. Bu sistem vasitəsilə Şimali Koreyaya milyonlarla dollar vəsait ötürülüb.
Çepmen məhkəməyə göndərdiyi məktubda həmin dövrdə xərçənglə mübarizə aparan anasının yanında qala bilmək üçün evdən işləyə biləcəyi bir iş axtardığını bildirib. Onun sözlərinə görə, yaşadığı bölgədə iş imkanları məhdud olub və bu iş ona həm başqalarına yardım etmək, həm də ailəsinin yanında qalmaq imkanı verib. Anası 2023-cü ildə vəfat edib.
Çepmen məktubunda qeyd edib: "Əməllərim nəticəsində zərər görən hər kəsdən ürəkdən üzr istəyirəm. Məni yaxaladığı üçün Federal Tədqiqat Bürosuna (FTB) təşəkkür edirəm. Həbsdən çıxdıqdan sonra yazmaqda olduğum kitablara və yaratmaq istədiyim iç geyim markasına fokuslanmağı planlaşdırıram".
Dələduzluq yalnız şəxsiyyət oğurluğundan ibarət olmayıb. Şimali koreyalı hakerlərin amerikalı kimi görünərək işə düzəlməsi üçün bir sıra rəsmi sənədlər hazırlanıb. Tərcümeyi-hal tərtib etmək, işə qəbul sənədlərini doldurmaq, hətta İ-9 kimi əmək icazəsi formalarını tamamlamaq bu sxemin bir hissəsi olub.
FTB tərəfindən əldə edilən bir söhbətdə Çepmen İ-9 formalarının ünvanına göndərilməsindən məmnun olduğunu, lakin həmin sənədləri şəxsən doldurmadığını deyib. Səbəb olaraq isə federal sənədlərdə saxtakarlığın federal həbsə səbəb olacağını göstərib.
Ətraflı
Çepmen bu sxemin texniki hissəsində də aktiv rol oynayıb. Şirkətlər tərəfindən işə götürülən şəxslərə göndərilən korporativ noutbukların bəziləri Çində, Şimali Koreya sərhədinə yaxın bir şəhərə göndərilsə də, 90-dan çox noutbuk birbaşa Çepmenin Arizona ştatındakı evində saxlanılıb.
Şimali koreyalı hakerlər həmin noutbuklara "proxy”, VPN və "Anydesk” kimi uzaqdan idarəetmə vasitələri ilə qoşularaq ABŞ-dan fəaliyyət göstərirmiş kimi görünür, "Zoom” görüşlərində iştirak edir, maaş alır, bəzən isə fidyə proqramı yerləşdirir və ya məlumat sızdırıblar.
Çepmen bu cihazları evindəki rəflərə düzərək hər birinin üstünə yapışqan qeydlərlə hansı "işçiyə” və hansı şirkətə məxsus olduğunu yazır və sistemi bu şəkildə nəzarətdə saxlayırdı. FTB evə reyd keçirdikdə bu düzəni sənədləşdirən fotolar əldə edib.
Çepmenin həyat hekayəsi qaranlıq keçmişlə müşayiət olunur. Vəkilinin bildirdiyinə görə, Çepmen uşaqlığında atasının alkoqolizmi və laqeyd münasibətindən əziyyət çəkib. O, orta məktəbi bitirməmişdən əvvəl 12 fərqli məktəbdə oxumağa məcbur olub.
Məhkəmə sənədlərinə əsasən, Çepmen həmçinin böyük qardaşı tərəfindən fiziki zorakılığa məruz qalıb, ailəsi və ətrafındakı digər şəxslər tərəfindən isə cinsi istismara uğrayıb. Bu çətinliklər onu zamanla cəmiyyətdən uzaqlaşdırıb və tənha bir həyata sürükləyib.
Bu cinayətdən yalnız Çepmen deyil, şəxsiyyətləri oğurlanan şəxslər də ciddi zərər görüb. Məhkəmədə çıxış edən bir zərərçəkmiş bu təcrübəni belə təsvir edib: "Şəxsiyyət oğurluğu fiziki hücum olmasa da, psixoloji və maliyyə təsirləri dərin və qalıcıdır. Şəxsi məlumatlarımı geri toplamağa çalışarkən elə bil biri həyatımın içinə girib və məni parçalayıb. Məlumatlarımın yenidən sui-istifadə ediləcəyindən daimi qorxu içindəyəm".
Çepmen 8,5 illik həbs cəzasına əlavə olaraq 3 il nəzarət altında azadlıq, 176.850 dollar təzminat və Şimali Koreyaya ötürülmüş 284.555 dollar gəlir itkisini ödəməklə də cəzalandırılıb.
