1991-ci ildə şahzadə Diana tərəfindən gizli şəkildə möhürlənən zaman kapsulu Londondakı "Great Ormond Street" Uşaq Xəstəxanasında yeni qan mərkəzi üçün aparılan tikinti işləri zamanı aşkar edilib.
1xeber.media xəbər verir ki, xəstəxanadan verilən açıqlamaya görə, kapsulun açılması ilə ortaya çıxan əşyalar hər kəsi təəccübləndirib.
"CNN International"ın xəbərinə görə, kapsulun çıxarılması prosesində 1991-ci ildə doğulanlar və ya həmin vaxt xəstəxanada çalışan işçilər iştirak ediblər. O dövrdə xəstəxanada çalışmış baş tibb mütəxəssisi Canet Holmes kapsuldan çıxan cib ölçülü televizoru görəndə duyğulandığını bildirib
"İçindəki əşyalar məni o illərə apardı. Xüsusən də cib televizorunu görüncə xatirələr canlandı. O zamanlar həyat yoldaşıma almışdım ki, ölkəboyu avtobusla səyahət edərkən qısa fasilələrdə izləyə bilsin. Çox baha idi".
Kapsulun içindən müğənni Kayli Minouqun CD-si, ağac toxumları, günəş enerjili kalkulyator, britaniya sikkələri, qar dənəsi holoqramı, təkrar emal olunmuş kağız və Avropa pasportu tapılıb.
Diana 1989-cu ildə GOSH-un rəhbəri olmuş və xəstəxananı tez-tez ziyarət edərək uşaqlarla yaxından maraqlanmışdı. Kapsul isə 1991-ci ildə "Variety Club" binasının təməlqoyma mərasimində basdırılmışdı.
Pediatrik hematologiya-onkologiya və sümük iliyi transplantasiyası klinikasının tədqiqatçı həkimi Roxana Redkar kapsulun açılmasında iştirak etdiyi üçün böyük həyəcan yaşadığını deyib:
"Bu tədbirin bir hissəsi olmaq möhtəşəm idi. Mən GOSH-a cəmi altı ay əvvəl qoşulmuşam və kapsulun çıxarılmasında iştirak etmək məni çox sevindirdi. Üstəlik, mən də həmin il – kapsulun basdırıldığı ildə doğulmuşam".
