“Azərbaycan dövləti Prezident səviyyəsində İran rejimi ilə bağlı konkret mövqeyini sərgilədi”.
Bu sözləri Globalinfo.az-a politoloq Turab Rzayev Prezident İlham Əliyevin yanvarın 7-də yerli televiziya kanallarına müsahibəsində İranın Azərbaycana qarşı mövqeyi ilə bağlı fikirlərini şərh edərkən deyib.
Politoloqun sözlərinə görə, Azərbaycan bütün qonşuları ilə isti münasibətlər qurmağa çalışıb:
“Yəni bizim nə İran, nə Rusiya, nə də digər ölkələrlə problemimiz var. Ortada problem varsa, bunu qarşı tərəf yaradıb. Hətta 44 günlük müharibə dövründə İran Ermənistana göndərilən 500 ton silah-sursatın ölkəsindən keçməsinə icazə verməsinə baxmayaraq, Bakı münasibətləri pozmadı. Ancaq təəssüf ki, ölkəmizin bu mövqeyi başda İran olmaqla bəzi ölkələr tərəfindən yanlış anlaşılıb”.
Politoloq qeyd edib ki, İranda Prezident İlham Əliyevə ünvanlanan neqativ fikirlər Tehrandakı rejimdən qaynaqlanır:
“Yəni istər Rusiyada, istərsə də İranda bir idarəetmə mexanizmi varsa, bu, mərkəzdən tənzimlənir. Belə ölkələrdə ayrı-ayrı fərdlərin özbaşına nəsə deməsi nadir hallarda olur. Prezident İlham Əliyev də bunu son müsahibəsində açıq şəkildə ifadə etdi. Ərdəbildəki mərasimdə Türkiyə, Azərbaycan əleyhinə deyilənlər İran rejiminin işidir.
Ərdəbilin imamcüməsi İranın ali rəhbəri (Əli Xamenei – red.) tərəfindən təyin edilib. Yəni imamcümə onun qərarlarını icra edir. Deməli, bu, Tehranın mövqeyidir. Bakı bunu cavabsız qoymaz”.
