Los-Ancelesdəki yanğın fəlakəti zamanı möcüzələr baş verir. ABŞ-da məşhur professor və iş adamı Devid Ştaynerə məxsus villa xoşbəxtlikdən yanğından xilas olub. Bölgədə külə dönmüş yeganə sağ qalan tikili kimi diqqət çəkən villanın dəyərinin 8 milyon dollar olduğu öyrənilib. Villaya necə ziyan dəymədiyi maraq mövzusu olaraq qalır.
1xeber.media xəbər verir ki, yanğınsöndürənlərin müdaxiləsindən sonra demək olar ki, zərər görmədən xilas olan villanın yaşayış sahəsi 390 kvadratmetrdir. Villada həmçinin dörd yataq otağı və dörd vanna otağı var.
İndiyədək 12 min ev və avtomobilin külə döndüyü bildirilir. 150 minə yaxın insanın hələ də evlərinə dönməsinə icazə verilmir. Yanğının vurduğu zərərin 60 milyard dollar olduğu düşünülür.
Los-Ancelesdə baş verən yanğınlarda azı 11 nəfərin öldüyü açıqlanıb. Yanğınsöndürmə idarəsindən verilən yeni məlumata görə, sahildə yerləşən Sakit okean Palisades bölgəsində baş verən yanğınlarda 5 nəfər, Altadenanın şimal bölgəsində isə 6 nəfər ölüb.
