Xəbər verdiyimiz kimi, 2025-ci ilin II rübündə Azərbaycanda tikinti-quraşdırma işlərində istehsalçı qiymət indeksi I rüblə müqayisədə 100,2 faiz təşkil edib. Dövlət Statistika Komitəsinin məlumatına görə, bu göstərici yerüstü tikililər üzrə 100,1 faiz, yol və körpü tikintisi üzrə isə 100,5 faiz olub.Ötən ilin yanvar-iyun ayları ilə müqayisədə 2025-ci ilin eyni dövründə yaşayış evləri üzrə qiymət indeksi 101,1 faiz səviyyəsində qeydə alınıb.
Bəs yaşayış evlərində bahalaşmanın səbəbləri nələrdir?
1xeber.media xəbər verir ki,mövzu ilə bağlı Bakupost.az -a danışan əmlak məsələləri üzrə ekspert Elnur Azadov bildirib ki, son 5 ildə ölkədə daşınmaz əmlakın qiyməti dayanmadan qalxır və bunun əsas səbəbi tikinti şirkətləri arasında rəqabətin olmamasıdır:
“Şirkətlər arasında rəqabət olmadığı üçün şəhərdə yeni tikintiyə başlayan binaların sayı olduqca azdır. Qiymətlərin artmasına isə bütün şirkətlər səbəb olublar. Onlar qiymətləri artırdıqca, bu tendensiya bütün daşınmaz əmlak sektorunda öz əksini tapmağa başlayıb”.
Ekspertin sözlərinə görə, rəqabətin azalması Tikinti və Şəhərsalma Komitəsinin fəaliyyəti ilə bağlıdır:
“Çünki məhdudiyyətləri onlar qoyur, icazələri də onlar verir. Uzun müddətdir ki, tikinti şirkətləri Dövlət Şəhərsalma və Arxitektura Komitəsindən icazə ala bilmirlər”.
Elnur Azadov əlavə edib ki, hazırda daşınmaz əmlak bazarında həm satış, həm də icarə sahəsində qıtlıq yaranıb:
“Məsələn, vətəndaşlar ipoteka götürürlər, lakin ipoteka seçimi üçün vaxtları məhdud olur. Bir çox hallarda əmlak tapa bilmədikləri üçün ipoteka götürə bilmirlər. Bu, ciddi göstəricidir ki, bazarda satışa çıxarılan əmlakların sayı getdikcə azalır. Amma tələbat yüksəkdir. Qiymətlərin dayanmadan artması vətəndaşları daha çox ipotekaya müraciət etməyə vadar edir. Bu, həm ehtiyacdan, həm də qeyri-ehtiyacdan, yəni investisiya baxımından yaranır”.
