Azərbaycanda repetitorluğun ləğvi müzakirə edilir. Ötən gün mətbuat konfransında elm və təhsil naziri Emin Əmrullayev repetitorluğun mərhələli şəkildə ləğv ediləcəyini bildirib. O qeyd edib ki, müəllimlərin məktəb daxilində dərsdən sonra repetitorluqla məşğul olması doğru deyil.
"Dəbə görə də repetitor yanına gedənlər var. Öz sinfində dərs dediyi uşağa dərsdən sonra da repititorluq etmək ayıbdır. Repetitorluğun ləğvi birdən-birə aparıla bilməz, mərhələli şəkildə ləğv ediləcək", - nazir deyib.
Qeyd edək ki, repetitorluq məsələsi uzun illərdir müzakirə olunan təhsilin ən "yaralı" yerlərindən biridir. Bəzən repetitorluğun biznesə çevrilməsi ilə bağlı narahatlıqlar ifadə olunur. Bəzi müəllimlərin şagirdlərinə dərsdə yetərli bilik vermədikləri və onları öz evinə repetitor hazırlığına məcbur etdikləri barədə xəbərlər də geniş yayılıb.
Repetitorluq barədə müzakirə aparılarkən ən çox səsləndirilən fikirlər müəllimlərin maaşının az olması və bu səbəbdən repetitorluğa məcbur qalması ilə bağlı olur.
"Eyni müəllim necə ola birər ki, məktəbdə pis tədris verir, amma evdə yaxşı?! Hesab edirəm ki, bu işdə əsas məsələ vicdandır. Cəmiyyətin də buna qınağı olmalıdır. Məktəbdə öz şagirdinə dərs deyən müəllim həm də onun repetitorudursa, bu, peşə etikasından uzaqdır. Bu, ayıbdır. Müəllim olaraq işini görüb dövlətdən maaş alırsa, dərs dediyi şagirdə də bunu düzgün öyrətməlidir", - ötən gün mətbuatla görüşündə nazir belə bir fikir səsləndirib.
1xeber.media xəbər verir i Modern.az-a danışan Milli Məclisin Elm və təhsil komitəsinin sədri Anar İsgəndərov bildirib ki, Elm və Təhsil Nazirliyi repetitorluğu ləğv edə bilməz:
“Sadəcə olaraq repetitorluq tədricən aradan qalxa bilər. O da məktəblərdəki dərslərin səviyyəsi ilə bağlıdır. Məktəbin şəraiti, texniki bazası normal, lavazimatları yerində, istiliyi təmin edilmiş, müəllimi yüksək səviyyəli tədrisi yerində olduqdan sonra repetitorluğa ehtiyac olmur. Bunlar öz yerində olduqdan sonra repetitorluğa heç bir ehtiyac qalmayacaq. Emin Əmrullayev də dünənki çıxışında bunu nəzərdə tuturdu. Yoxsa əmrlə repetitorluğu ləğv etmək olmaz. Hər bir şagird müəllim yanına gedir, onun qarşısını kim ala bilər?! Kim deyə bilər ki, bu sistem ləğv olunsun?! Nazir o mənada dedi ki, mətkəblərdəki təhsil o qədər yüksək səviyyəyə qaldırılacaq ki, şagirdin başqa müəllimin yanına getməsinə ehtiyac qalmayacaq”.
A.İsgəndərovun sözlərinə görə, burada müəllimlərin əmək haqqı yüksək olmalıdır:
“Bu gün müəllimi də fikirləşmək lazımdır. Müəllim nə üçün repetitorluq edir, abituriyent hazırlayır?! Onun da ehtiyacı var, onun gələcəkdə həmin ehtiyacı ödənəcək. Məktəb, müəllim və şagird üçün lazım olan şərait yaradılsa, repetitorluğa ehtiyac qalmayacaq. Məktəb deyəndə təkcə Bakını yox dağ rayonlarını, onların şəraitini də fikirləşmək lazımdır. Müəllimlər peşəkar və məktəbə məhəbbətlə fəaliyyət göstərməlidir. Müəllimin aldığı əməkhaqqı da burada əsasdır. Emin Əmrullayev onu dedi ki, bunların hamısı olacaqsa, nə müəllimin abituriyent hazırlamağa, nə də şagirdin əlavə müəllim yanına getməyə ehtiyacı olacaq”.
