Azərbaycan və Rusiya arasındakı münasibətlər xeyli gərginləşib. Maraqlıdır ki, bu gərginlik fonunda belə bəzi dövlət dairələrində rus dilində danışılır, hətta işçi qəbul edərkən ondan rus dili biliyi tələb olunur.
Bəzi məmurların bu cür davranışı, rus dilinə "sevgisi" təbii ki, birmənalı qarşılanmır və haqlı narazılıq doğurur.
Mövzu ilə bağlı Milli Məclisin komitə sədri Tahir Rzayev Modern.az-a bildirib ki, dövlətlər arasında münasibətlərin yaxşılaşdırılması, əməkdaşlığın genişləndirilməsi əlbəttə ölkələrin inkişafı üçün çox vacibdir:
“Azərbaycan-Rusiya münasibətlərinin yaxşılaşdırılması bu baxımdan önəmlidir. Azərbaycan Prezidenti cənab İlham Əliyev daim bu əməkdaşlığın genişləndirilməsinə böyük önəm verir. Müəyyən münasibətlərdə problemlər yarana, fikir ayrılığı ola bilər. Bu düşmənçilik sayıılmamalıdır. Hər bir ölkə məsələlərə münasibətdə öz milli təhlükəsizlik mövqeyindən yanaşır, bu da təbiidir”.
T.Rzayev bildirib ki, hər bir xalq öz dilini, adət-ənənəsini qorumalıdır, tarixinə, milli dəyərlərinə hörmətlə yanaşmalıdır:
“Çox dil bilmək eyib deyil, ancaq ana dilini yaddan çıxarmaq, ana dilində danışmamaq eyibdir. Müəyyən insanlar bu məsələdə laqeydliyə yol verirlərsə, bu onların problemidir. Əlbəttə ki, ictimaiyyət arasında öz dilini qoyub rus dilində danışırsansa, bu ana dilinə laqeydliyin nümunəsidir. Ancaq bu o demək deyil ki, dillərə insan kimi hörmətin, məhəbbətin olmasın. İnsan bacardığı qədər çox dilə yiyələnməlidir. Bu onun intellektindən, dünyaya baxışından və dillərə münasibətindən xəbər verir. Əlbəttə ki, Azərbaycan dili xalqımız üçün daha doğma, daha əzizdir. Hər bir kəs öz dilini qorumalı, inkişaf etdirməli, milli-mənəvi dəyərlərinə sadiq qalmalıdır”.
