Avtonəqliyyat vasitələri üzrə ən çox sığorta müqaviləsi 2009-2013-cü illərdə istehsal edilmiş nəqliyyat vasitələrinin payına düşüb. Ən çox sığorta hadisəsi 2004-2008-ci illərdə istehsal edilmiş nəqliyyat vasitələri üzrə qeydə alınıb.
1xeber.media xəbər verir ki, bunu bu gün İcbari Sığorta Bürosunun baş informasiya meneceri Anar Səmədov Azərbaycan Maliyyə Forumunda çıxışı zamanı deyib.
O bildirib ki, orta sığorta haqqı üzrə ən yüksək göstərici 1999-2003-cü il istehsallı avtonəqliyyat vasitələri üzrə təşkil edib:
"Belə ki, qeyd olunan illər çərçivəsində istehsal olunan avtomobillərin orta sığorta haqqı üzrə ən yüksək göstərici 91 manat olub. 1993-cü ildən aşağı istehsal ili olan avtonəqliyyat vasitələrində 1309 manat göstərici ilə ən yüksək orta sığorta ödənişi qeydə alınıb".
"36-50 yaş aralığında sığorta müqavilələrinin sayı daha çoxdur. Hadisələrin sayı da elə bu yaş qrupu üzrə daha çox baş verib. Ən çox ödənilən zərər məbləği kateqoriyası 1000 manatdan aşağı olan hissəyə aiddir.
Hadisə tezliyi üzrə ilk üçlükdə Abşeron, Sumqayıt və Bakı şəhərləri qərarlaşır", - deyə A. Səmədov qeyd edib.
