ABŞ və Rusiya rəsmilərinin Səudiyyə Ərəbistanında 18 fevraldan etibarən Ukrayna ilə bağlı danışıqlara başlayacaqları gözlənilir. Hazırda bu danışıqların gündəmdə olduğu bir zamanda ABŞ Prezidenti Donald Trampın Ukraynadan istəyi müzakirələrə səbəb olub.
Tramp sosial şəbəkə hesabında paylaşım edərək Vaşinqtonun Kiyevdən qiymətli nadir torpaq metallarını istədiyini bildirib. ABŞ prezidentinin bu paylaşımı bir növ Ağ Evin Ukraynadakı müharibəni dayandırmaq üçün Prezident Volodimir Zelenskidən tələbi olaraq qiymətləndirilir.
Ukraynada hansı qeyri-adi yeraltı sərvətlər var? Trampın istədiyi metallar ölkənin hansı ərazisində yerləşir?
Globalinfo.az Ukraynanın yeraltı sərvətləri haqda məlumatları təqdim edir:
Bu ölkənin təbii ehtiyatlarının ümumi dəyəri təxminən 15 trilyon dollara çatır ki, onun da 70 faizdən çoxu üç regionun payına düşür: Donetsk, Dnepropetrovsk və Luqansk.
“Forbes”in məlumatına görə, Ukraynanın təbii ehtiyatlarının ümumi dəyəri sonuncu dəfə 2005-ci ildə hesablanıb. O vaxt aşkar edilmiş ehtiyatlar dövlət sənədlərində 7-10 trilyon dollar qiymətləndirilirdisə, bu göstərici indi xeyli artıb.
Müharibənin başladığı gündən bu günə qədər Rusiya Ukraynanın 41 kömür yatağı, 27 təbii qaz yatağı, 14 propan yatağı, 9 neft yatağı, 6 dəmir filizi yatağı, iki titan filizi yatağı, iki sirkonium filizi sahəsi və bir uran və qızıl mədəni, habelə Ukraynada əvvəllər polad istehsalı üçün istifadə edilən iri əhəngdaşı karxanasını ələ keçirib.
Mütəxəssislərin hesablamalarına görə, Ukrayna kömür yataqlarının 63 faizini, neft yataqlarının 11 faizini, təbii qaz yataqlarının 20 faizini, metal yataqlarının 42 faizini və nadir torpaq mineral yataqlarının, o cümlədən litiumun 33 faizini itirib.
Lakin bu ölkə hələ də mineral ehtiyatları baxımından zəngindir:
1.Aşkar edilmiş uran filizi ehtiyatlarına görə Avropada 1-ci, titan filizi ehtiyatlarına görə 2-ci, dünyada isə 10-cu yeri tutur;
2. Aşkar edilmiş manqan filizi ehtiyatlarına görə dünyada 2-ci yeri tutur (2,3 milyard ton və ya dünya ehtiyatlarının 12%-i);
3. Dəmir filizi ehtiyatlarına görə dünyada 2-ci yeri tutur (30 milyard ton);
4.Civə filizi ehtiyatlarına görə Avropada 2-cidir;
5. Şist qaz ehtiyatlarına görə Avropada 3-cü, dünyada 13-cüdür (22 trilyon kubmetr);
6. Kömür ehtiyatlarına görə dünyada 7-ci yerdədir. (33,9 milyard ton).
Qeyd edək ki, bu informasiyalar müxtəlif mənbələrdən əldə edilib. Bu səbəbdən rəqəmlərdə müəyyən fərqlər ola bilər.
