Fövqəladə Hallar Nazirliyinin Dövlət Yanğın Nəzarəti Xidməti ölkə ərazisində yanğın təhlükəsizliyinin etibarlı təmin edilməsi məqsədilə növbəti monitorinq tədbirlərini yerinə yetirilib.
1xeber.media xəbər verir ki, bunu Fövqəladə Hallar Nazirliyinin (FHN) Dövlət Yanğın Nəzarəti Xidmətinin rəis müavini Cəmil Xudiyev jurnalistlərə açıqlamasında deyib.
Onun sözlərinə görə, tədbir çərçivəsində çoxmənzilli yaşayış binasının qeyri-yaşayış sahəsində fəaliyyət göstərən bəzi ictimai iaşə obyektlərində fərdi balon qurğularından, başqa sözlə desək, maye karbohidrogen qaz balonları ilə dolu propan qaz balonlarından istifadə halları aşkar edilib:
"Bu balonların tərkibində yüksək təzyiq altında qaz doldurulmuş olur və onların sızması, texniki təhlükəsizlik tələblərinə cavab verməməsi kimi hallar partlayış və yanğın hadisələri ilə nəticələnir. Əhalinin sağlamlığının, o cümlədən dövlətin əmlak maraqlarının müdafiəsinin təmin edilməsi məqsədilə aparılmış monitorinq çərçivəsində sahibkarlarla profilaktik söhbətlərin nəticəsi olaraq qurğuların obyektlərindən kənarlaşdırılması təmin olunacaq".
Cəmil Xudiyev bildirib ki, belə qanun pozuntularına yol verən şəxslərlə bağlı növbəti yoxlamalar zamanı qanunvericilikdə nəzərdə tutulan ciddi tədbirlər görüləcək:
"Fərdi balon daşınan qurğudur və yanğın nəzarəti üzrə dövlət inspektorlarının hər ictimai iaşə obyektində bu təsərrüfatla bağlı fəaliyyəti nəzarətdə saxlamaq, gündəlik bu qurğularla təmin etmək imkanları yoxdur. Bu səbəbdən də "Yanğın təhlükəsizliyi haqqında" Azərbaycan Respublikasının Qanunun 6-cı və 7-ci maddələrində vətəndaşların, o cümlədən müəssisə rəhbərlərinin üzərinə konkret vəzifə qoyulur. Qanunla həmin şəxslər istifadəsində olan ərazilərdə yanğın təhlükəsizlik qaydalarının tələblərinə ciddi riayət etməlidirlər. Bu, onların vəzifə borclarıdır.
Onlar bilməlidirlər ki, bu sahədə vəzifə borcunun yerinə yetirilməməsi cinayət məsuliyyətini formalaşdırır".
