Qaradağ rayonu Lökbatan qəsəbəsi ərazisində, Sədərək və Binə ticarət mərkəzlərinin yaxınlığında yerləşən gölün suyu və ətrafı çirkli vəziyyətdədir. Buna baxmayaraq, balıqçılar həmin göldən balıq tuturlar.
1xeber.media əraziyə baş çəkib, balıqçılarla həmsöhbət olub.
Onların sözlərinə görə, bəziləri sadəcə həvəskardır. Amma bir çox balıqçı tutduğu balığı həm yeyir, həm də satır.
Göldəki acınacaqlı vəziyyətlə bağlı ekoloq Rövşən Abbasov qeyd edib ki, ümumiyyətlə, Abşeron yarımadasında yerləşən göllərin ekoloji vəziyyəti qənaətbəxş deyil:
"Ölkənin ən böyük səkkiz gölü haqqında geniş araşdırma aparılıb və bu göllərin müxtəlif tullantılarla çirkləndiyi müəyyən olunub. Sözügedən göldə də çirkləndiricilər var. Bu tip göllərdə balıq tutulmamalıdır. Balıq çirkabı öz bədəninə tez çəkən bir canlıdır”.
İri Şəhərlərin Birləşmiş Su Təchizatı Xidmətinin mətbuat katibi Ceyhun Musaoğlu isə bildirib ki, qeyd olunan ünvanda mərkəzləşmiş tullantı su şəbəkəsi mövcud deyil:
"Təchizat sistemi olmayan ərazilərdə Azərbaycan Dövlət Su Ehtiyatları Agentliyinin (ADSEA) sifarişi ilə təchizatın qurulması üçün müvafiq layihə sənədləri hazırlanıb. Layihələrin icrası təchizat sisteminin mövcudluğu, texniki vəziyyəti və digər amillər nəzərə alınmaqla həyata keçirilir. Şəbəkələrin inşası agentliyin tədbirlər planına uyğun olaraq mərhələlərlə aparılır”.
Məsələ ilə bağlı Qaradağ Rayon İcra Hakimiyyəti Başçısının müavini Nadir Muradov "Sözügedən gölün və ətrafının vəziyyətindən xəbərdarsınızmı?” sualına "o gölə heç nə axıdılmır” cavabını verib.
Sözügedən göllə bağlı məlumat almaq üçün qurumun digər səlahiyyətli şəxsinə yönləndirildik. Onunla dəfələrlə telefon əlaqəsi saxlamağa çalışsaq da, zənglərimiz cavabsız qaldı.
