Akademik M. A. Topçubaşov adına Elmi Cərrahiyyə Mərkəzinin (Eksperimental xəstəxana) həyətindəki ağacların kütləvi şəkildə kəsilməsi və həmin ərazidə tikinti işlərinə başlanacağı barədə iddialar yayılıb.
Bu barədə Gununsesi.info-ya ya sözügedən ərazidə yaşayan sakinlər deyib.
Onlar iddia edirlər ki, iki ildir, xəstəxanın ərazisi hasarlanıb və ağaclar kütləvi şəkildə kəsilir.
Sakinlər ərazidə tikinti işləri aparılacağı ilə bağlı hazırlıqların görüldüyünü də vurğulayıblar. Onlar bu vəziyyətin təbiətə zərər verdiyindən narahatdırlar.
Məsələ ilə bağlı M. A. Topçubaşov adına Elmi Cərrahiyyə Mərkəzinə müraciət etdik.
Mərkəzinin direktoru Rauf Ağayev sorğumuza cavab olaraq bildirdi ki, sözügedən ərazidə qanunsuz ağac kəsilməsi ilə bağlı məlumatlar doğru deyil:
“Payız aylarında 600-dan çox ağac və gül əkilib. Hasara alınmış ərazi isə xəstəxananın ərazisi ərazisi deyil. Həmin ərazidə Katolik kilsəsi tikiləcək. Ekologiya və Təbii Sərvətlər Nazirliyinin ekspertiza idarəsi tərəfindən müvafiq rəyə əsasən, xəstəxanın ərazisində ancaq qurumuş ağaclar kəsilib”.
Qurumdan bildirilib ki, hal-hazırda xəstəxananın ərazisində aparılan tikinti işləri, həmin ərazidə inşa olunan yanğın-su hovuzunun yaradılması ilə əlaqədardır.
