Azərbaycan Respublikasının Hərbi prokuroru Xanlar Vəliyev bu gün rəsmi olaraq vəzifə səlahiyyətlərini başa vurub. Onun 2005-ci ildə başladığı və düz 20 il davam edən hərbi prokurorluq fəaliyyəti bu gün etibarilə sona çatıb.
Azərbaycan Konstitusiyasına görə, hərbi prokuror vəzifəsi beşillik müddətlə təyin olunur. Prezident Xanlar Vəliyevi bu müddət ərzində dəfələrlə yenidən təyin etsə də, budəfəki müddət başa çatdıqdan sonra onun vəzifəyə yenidən gətirilməsi həyata keçirilmədi.
Xanlar Vəliyevin uzun illik xidmətləri ölkə rəhbərliyi tərəfindən qiymətləndirilib. Belə ki, Prezident İlham Əliyevin sərəncamı ilə ona 1-ci dərəcəli “Vətənə xidmətə görə” ordeni təqdim olunub. Ordeni Xanlar Vəliyevə Baş prokuror Kamran Əliyev təqdim edib.
Xanlar Vəliyevin tərcümeyi-halı – 45 illik hüquq karyerası
Xanlar Telman oğlu Vəliyev 1955-ci ildə anadan olub. 1978-ci ildə Bakı Dövlət Universitetinin hüquq fakültəsini fərqlənmə diplomu ilə bitirib. Həmin ildən başlayaraq prokurorluq orqanlarında müxtəlif vəzifələrdə çalışıb: Gəncə şəhər prokurorluğunun baş müstəntiqi, şəhər prokurorunun köməkçisi, Qazax və Şəmkir rayon prokurorlarının müavini vəzifələrində olub.
1993–2000-ci illərdə Azərbaycan Respublikası Baş prokurorunun müavini, 2005-ci ilin 10 fevral tarixindən isə Azərbaycan Respublikasının Hərbi prokuroru təyin edilib. Bu vəzifədə 20 il fasiləsiz çalışaraq ölkənin hüquq sistemində ən uzun müddət vəzifədə qalan yüksək vəzifəli prokurorlardan biri hesab olunur.
Ailəlidir, üç övladı var. Gəncə Şəhər İcra Hakimiyyətinin sabiq başçısı Elmar Vəliyevin qardaşıdır.“Tərtər işi”ndə adı keçən ən tanınmış fiqur
1xeber.media xatırladır ki, Xanlar Vəliyevin adı 2017-ci ildə baş verən və “Tərtər işi” kimi tanınan cinayət işi ilə bağlı ictimaiyyət qarşısında ən çox hallanan vəzifəli şəxslərdən biridir.
Həmin il onlarla hərbçi “dövlətə xəyanət” ittihamı ilə saxlanılmış, işgəncəyə məruz qalmış, onların arasında istintaq zamanı ölənlər də olmuşdu.
Hüquq müdafiəçilərinin bildirdiyinə görə, 100-dən artıq hərbi qulluqçu (əsgər, çavuş, gizir və zabit heyəti) işgəncələrə məruz qalıb, 25 nəfərə uzunmüddətli azadlıqdan məhrum etmə cəzası verilib və 13 nəfər işgəncə nəticəsində vəfat edib.
Vəliyev o vaxt ölkənin baş hərbi prokuroru kimi prosesə birbaşa nəzarət səlahiyyətinə malik idi. Hadisələr ictimailəşdikdən sonra hüquq-mühafizə orqanlarına qarşı ittihamlar səsləndirildi, ictimai rəyə görə, Xanlar Vəliyev bu ağır cinayətlərin qarşısını almaqda və hüquqi prosesə obyektiv nəzarət etməkdə ciddi şəkildə aciz qalıb.
Xanlar Vəliyev bundan sonra hansı işlə məşğul olacaq?
Məlumata görə, onun Konstitusiya Məhkəməsinin hakimi kimi fəaliyyət göstərməsi gözlənilir.
Qeyd edək ki, Xanlar Vəliyev Gəncənin sabiq icra başçısı Elmar Vəliyevin qardaşıdır.
Musavat.com
