Prezident İlham Əliyevin 23 dekabr 2024-cü il tarixli “Əhalinin sosial rifahının yaxşılaşdırılması sahəsində əlavə tədbirlər haqqında” sərəncamının bir hissəsi hələ də icra olunmayıb. Prezident, müavinət və təqaüdlərin artırılması ilə bağlı Nazirlər Kabinetinə 3 ay ərzində təkliflər hazırlayıb təqdim etməyi tapşırmışdı. Amma bu tarixdən bir aya yaxın vaxt keçib, hələ də müvafiq qərar qəbul edilməyib.
Yaxın günlərdə təqaüdlər və müavinətlərin artırılması ilə bağlı addımlar atıla bilərmi?
1xeber.media xəbər verir ki,Milli Məclisin deputatı, iqtisadçı alim Əli Məsimli “AzPolitika”ya açıqlamasında bildirib ki, sözügedən sərəncamda yalnız minimum əməkhaqqı və pensiya deyil, həmçinin sosial müavinətlərin və təqaüdlərin də artırılması nəzərdə tutulub.
Onun sözlərinə görə, həmin sərəncamda Nazirlər Kabinetinə 3 ay müddətində, yəni ən geci martın 23-dək sosial müavinətlərin və təqaüdlərin artırılması ilə bağlı təkliflərini Azərbaycan Prezidentinə təqdim etməsi tapşırılmışdı: “Məsələyə həmin sərəncamın minimum əməkhaqqı və minimum pensiya ilə bağlı hissələrinin vaxtında reallaşdırılması məntiqindən yanaşsaq, sosial müavinətlərin və təqaüdlərin artırılması məsələsi aprel ayında yekunlaşdırılmalıdır. Əgər bu ay reallaşdırılmasa, onda növbəti aylara qalacaq və konkret nə vaxt reallaşacağını söyləmək çətindir.
Məlumdur ki, 2019-cu ildən müharibə veteranlarımıza kommunal xərclərin ödənilməsi məqsədilə “veteran pulu” deyilən 80 manatlıq müavinət verilir. 2019-cu ildən bu yana həmin xərclər xeyli artıb. Əgər kommunal xərclər artıbsa, həmin müavinətin də müvafiq nisbətdə artırılması məntiqə uyğundur. Ona görə də hələ keçən ilin yayında biz bu məsələlər ətrafında Milli Məclisdə çıxış edərkən “veteran pulu” adlandırılan, müharibə veteranlarına verilən xüsusi Prezident təqaüdünün azı 2 dəfə artırılıb 80 manatdan 160 manata çatdırılmasını təklif etmişdik.”
Millət vəkili vurğulayıb ki, bu məbləğ 2025-ci ildən tətbiq olunan minimum pensiya göstəricisindən 100 manat və ya 45 faiz, ölkə üzrə yaşayış minimumundan isə 65 manat və ya 30 faiz azdır: “Biz Milli Məclisdə bu barədə çıxış edərkən yaşa görə müavinət alanların ağır vəziyyətini nəzərə alaraq, həmin məbləğin yaşayış minimumu ilə əlaqəli şəkildə artırılmasını təklif etmişdik. Məsələn, bu il üçün yaşa görə müavinət ölkə üzrə yaşayış minimumu kimi müəyyən edilən 285 manatdan aşağı olmasın. Amma sözügedən müavinətlərin dediyimiz nisbətdə artacağı barədə əminliklə fikir yürütmək çətindir və hər birinin nə qədər artacağını yalnız sənəd ortaya çıxdıqda biləcəyik.”
