"Azərbaycan Xalq Cümhuriyyəti indiki Ermənistanın suveren ərazilərinin 60%-dən çoxunu əhatə edir".
1xeber.media xəbər verir ki, bunu Ermənistanın xarici işlər naziri Ararat Mirzoyan Antalya Diplomatik Forumu çərçivəsində Türkiyə KİV-ə müsahibəsində deyib.
"Azərbaycan Konstitusiyasında İstiqlal Bəyannaməsinə istinad var. Onların İstiqlal Bəyannaməsində bəyan edilir ki, indiki Azərbaycan Respublikası SSR-in deyil, Azərbaycan Xalq Cümhuriyyətinin varisidir. Sovet İttifaqından əvvəl mövcud olmuş ilk Azərbaycan Respublikası isə indiki Azərbaycandan qat-qat böyük ərazilər üzərində öz suverenliyini elan edib. O, indiki Ermənistanın suveren ərazilərinin 60%-dən çoxunu əhatə edir", - deyə Mirzoyan qeyd edib.
Nazir həmçinin bildirib ki, İrəvan sülh sazişini imzalamağa hazırdır: "Dünyada bütün mümkün suallara cavab verəcək sülh sazişi yoxdur. Əgər iki cəmiyyət arasında düşmənçilik və qarşıdurma varsa, bir sənədlə hər şeyi həll edə bilməzlər. Sülh sazişi ikitərəfli mexanizmin - komissiyanın yaradılmasını nəzərdə tutur ki, bu mexanizm sazişin icrasına nəzarət edəcək, həmçinin proses zamanı qeydə alına biləcək və çox güman ki, bütün mümkün çətinliklər və qanun pozuntuları ilə məşğul olacaq. Başqa sözlə, biz bu problemləri idarə etmək üçün toplu hazırlayırıq".
Mirzoyan sülh sazişinin imzalanma yeri kimi Türkiyənin ev sahibi ola bilməsi ilə bağlı jurnalistin sualına belə cavab verib: "Düşünürəm ki, hər kəs üçün bütün nüansları başa düşmək vacibdir, əks halda mövcud vəziyyət haqqında dəqiq təsəvvürünüz olmayacaq. Bəli, alternativ olmadığına görə danışıqlar aparırıq. Əgər bizim sülh gündəmimiz varsa, o zaman danışıqlara hansı alternativ ola bilər? Beləliklə, danışıqlar davam edir. Yerə gəlincə, bilirsiniz, bu vacib deyil. Bunu Ermənistanla Azərbaycan sərhədində imzalamaq fikri var. Daha bir neçə paytaxt öz xidmətlərini təklif edir, mən heç nəyi istisna etmirəm. Mən hələ o təklifi almamışam. Heç bir variantı istisna etmirəm".
Nazir həmçinin ölkədə konstitusiya dəyişikliyindən də damnışıb: "Ermənistanda demokratik inqilab baş verəndə və indiki hakim partiyamız hakimiyyətə gələndə biz demək olar ki, dərhal Konstitusiyamıza dəyişiklik edəcəyimizi bəyan etmişdik. İndi isə bu, təkcə mövcud Konstitusiyaya dəyişiklik deyil, həm də yeni Konstitusiya olacaq. Konstitusiya dəyişiklikləri ilə məşğul olan mövcud komitə hüquqi mexanizmləri müzakirə edir və bildiyim qədər, komitənin mandatı 2026-cı ildə başa çatır. Həmin ildə parlament seçkilərimiz var. Deməli, 2018-ci ildən biz yeni Konstitusiyaya ehtiyacın olmasında israrlıyıq və bu, gündəmimizdə qalır. Biz bunu həyata keçirməyə hazırlaşırıq.
Amma məsələni Ermənistan-Azərbaycan münasibətlərinin normallaşması ilə əlaqələndirmək konstruktiv deyil".
XİN rəhbəri Aİ müşahidəçiləri ilə bağlı verilən sualı da cavablandırarkən qeyd edib ki, Avropa Monitorinq Missiyasının mandatı ilk növbədə Ermənistanla Azərbaycan arasında münasibətlərin normallaşdırılması prosesini dəstəkləməyə, eləcə də sərhəddə sabitliyin təmin edilməsinə yönəlib: "Sülh müqaviləsi imzalanan və qüvvəyə minən kimi artıq belə bir missiyaya ehtiyac qalmayacaq.
Bu o deməkdir ki, sərhəd boyu sabitlik bərqərar olduqdan sonra mandat, missiya tamamlanıb və heç bir əlavə işə ehtiyac qalmayacaq".
Mirzoyanın sözlərinə görə, hazırda üç ölkənin (Azərbaycan, Türkiyə və Ermənistan) birgə görüşü ilə bağlı heç bir razılaşma və ya plan yoxdur: "Lakin bir sıra müzakirələr gedir. Ümid edirik ki, bu prosesin müsbət nəticəsi olacaq". unikal
