Moskva Qarnizonu Hərbi Məhkəməsi Rusiya Silahlı Qüvvələrinin Baş Rabitə İdarəsinin sabiq rəisi – Baş Qərargah rəisinin müavini, general-leytenant Vadim Şamarini külli miqdarda rüşvət almaq ittihamı ilə 7 il müddətinə azadlıqdan məhrum edib.
1xeber.media Rusiya mətbuatına istinadla xəbər verir ki, Şamarin həmçinin hərbi rütbəsindən də məhrum edilib.
"Ümumilikdə, Şamarin 7 il müddətinə ciddi rejimli cəzaçəkmə müəssisəsində cəza çəkəcək, 7 il dövlət qulluğunda işləməsi qadağan edilib və hərbi rütbəsindən məhrum edilib", – onun vəkili Vladimir Şelupaxin məlumat verib.
Müzakirələr zamanı dövlət ittihamçısı Şamarinin 12 il müddətinə azadlıqdan məhrum edilməsini və 107 milyon rubl cərimələnməsini tələb edib.
2024-cü ilin noyabrında Şamarin ittiham olunduqdan sonra Perm telefon zavodunun – "Telta"nın rəhbərliyindən 36 milyon rubldan çox rüşvət aldığını etiraf edərək istintaqla əməkdaşlıq edib.
“Telta” Rusiya ordusunun geniş istifadə etdiyi, "tapiklər" adlanan TA-57 və TA-88 stasionar telefonları da daxil olmaqla, hərbi rabitə avadanlıqları istehsal edir.
Ötən il mayın 12-də Sergey Şoyqu Rusiya müdafiə naziri postundan istefa verdikdən sonra Müdafiə Nazirliyinin rəsmilərinə qarşı çoxsaylı korrupsiya işi açılıb. Həmin ilin aprelin sonunda müdafiə nazirinin müavini Timur İvanov, Şoyqunun istefasından iki gün sonra isə Müdafiə Nazirliyinin Baş Kadrlar İdarəsinin rəisi, general-leytenant Yuri Kuznetsov həbs edilib.
Rusiya Prezidentinin mətbuat katibi Dmitri Peskov o zaman bəyan etmişdi ki, yüksək rütbəli generallara qarşı cinayət işləri “kampaniya” deyil, korrupsiyaya qarşı “ardıcıl” mübarizənin nəticəsidir.
“AzPolitika.info”
