Ənənəvi və alternativ enerji mənbələri arasında balansın axtarışına qayıtmaq lazımdır.
1xeber.media xəbər verir ki, bu barədə “SOCAR Trading”in kommersiya məsələləri üzrə direktoru Tağı Tağızadə Bakıda keçirilən "Xəzər və Mərkəzi Asiya neft ticari-nəqliyyat forumunda bildirib.
"Bu gün tələbatın ödənilməsinə yönəlmiş bir çox qərarlar alternativlərə marağı dəstəkləyən aydın və stimullaşdırıcı tənzimləyici bazanın olmadığı təqdirdə əvvəlki kimi ənənəvi enerji və enerji təchizatına əsaslanır", - o qeyd edib.
T.Tağızadənin sözlərinə görə, bəzən yanaşmanı sadələşdirmək və əsaslara qayıtmaq: ticarətin mahiyyətini, ixracatçılarımızın kim olduğunu, emalın təchizat zəncirində niyə əsas rol oynadığını, logistika və gəmiçiliyin xüsusilə son illərdə əhəmiyyətini və infrastrukturun - istər terminallar, istərsə də anbarların hansı yeri tutduğunu aydın başa düşmək vacibdir.
O, həmçinin vurğulayıb ki, neft emalı zavodları getdikcə daha çox bio-hablara və saxlanc mərkəzlərinə çevrilir: "Bundan əlavə, kağız platformalarda bazar strukturunu və son illərin daimi xüsusiyyətinə çevrilmiş yüksək volatilliyi nəzərə almaq lazımdır".
“SOCAR Trading”in direktorunun fikrincə, bütün bu elementlər əhəmiyyət kəsb edir, lakin məhz tənzimləmə xüsusilə sanksiyalar və ticarət axınlarındakı dəyişikliklər kontekstində son illərdə bazar dinamikasını müəyyən edən əsas amillərdən birinə çevrilib.
"Əlbəttə, geosiyasətin təsirini də qiymətləndirmək lazımdır. Biz gərginliyin artmasını və ənənəvi marşrutlardakı (məsələn, Qırmızı dənizdə) pozuntuları müşahidə edirik. Bütün bunlar bazarın üzləşdiyi qeyri-müəyyənliyi gücləndirir", - o əlavə edib.
