“Pensiya yaşı tamam olan, lakin nə pensiya kapitalı, nə də stajı olmayan vətəndaşlarımız müavinət almaq hüququna malikdirlər”
1xeber.media xəbər verir ki,bunu Moderator.az-a açıqlamasında Milli Məclisin deputatı, iqtisadçı-ekspert Vüqar Bayramov deyib.
Onun sözlərinə görə, əmək pensiyası haqqında qanuna əsasən, vətəndaş pensiya almaq hüququna ya qanunvericiliklə müəyyən olunmuş minimum pensiya kapitalını topladıqda, ya da 25 il iş stajına malik olduqda sahib olur:
“Yəni, vətəndaşın pensiya yaşı tamam olubsa və eyni zamanda onun fərdi hesabında tələb olunan məbləğdə pensiya kapitalı varsa, o halda əmək pensiyası almaq hüququ qazanır. Əgər pensiya kapitalı kifayət etmirsə, lakin vətəndaşın azı 25 il sığorta stajı varsa, bu zaman da əmək pensiyası hüququ verilir. Qanunvericilikdə eyni zamanda pensiya amnistiyası da nəzərdə tutulur. Belə ki, 2018-ci il iyulun 1-dək fərdi hesabında pensiya kapitalı olan, hətta bu məbləğ cəmi 1 manat təşkil edən şəxslər belə əmək pensiyası almaq hüququna malikdirlər.
Əgər vətəndaşın fərdi hesabında heç bir pensiya kapitalı yoxdursa və eyni zamanda sığorta stajı da yoxdursa, bu halda o, əmək pensiyası deyil, yaşa görə sosial müavinətlə təmin olunur. Yəni pensiya yaşı tamam olduqda, vətəndaş aylıq əsasda yaşa görə sosial müavinət almaq hüququna malikdir. Bu baxımdan, pensiya yaşı tamam olan, lakin nə pensiya kapitalı, nə də stajı olmayan vətəndaşlarımız müavinət almaq hüququna malikdirlər”.
