Yeni Azərbaycan Partiyası (YAP) Sabunçu rayon təşkilatı və Sabunçu Rayon İcra Hakimiyyətinin birgə təşkilatçılığı ilə “Konstitusiya və Suverenlik İli” çərçivəsində görkəmli oftalmoloq alim, akademik Zərifə xanım Əliyevanın anadan olmasının 102 illiyi ilə əlaqədar Sabunçu Gənclər Evində “Həyata nur bəxş edən qadın - akademik Zərifə Əliyeva” adlı Forum keçirilib.
1xeber.media xəbər verir ki, tədbirdə YAP Sabunçu rayon təşkilatının sədri Araz Xudadanov, Sabunçu Rayon İcra Hakimiyyətinin başçısı Adil Vəliyev, Milli Məclisin deputatı Müşfiq Məmmədli, partiyanın Veteranlar Şurasının üzvü, “Modern Ailə və İnkişaf” İctimai Birliyinin sədri Zərifə Quliyeva, Akademik Zərifə Əliyeva adına Milli Oftalmologiya Mərkəzinin direktor müavini Səbinə Məcidova və rayonun səhiyyə, təhsil, mədəniyyət müəssisələrinin rəhbərləri iştirak ediblər.
Əvvəlcə tədbirdə Azərbaycan Respublikasının Dövlət Himni səsləndirilib, Ulu Öndər Heydər Əliyevin, akademik Zərifə xanım Əliyevanın və ölkəmizin suverenliyi və ərazi bütövlüyü uğrunda canlarını qurban vermiş şəhidlərin əziz xatirəsi ehtiramla yad olunub.
Sonra Zərifə xanım Əliyevanın zəngin həyat və yaradıcılığından bəhs edən videoçarx nümayiş etdirilib.
Çıxış edən forum iştirakçıları vurğulayıblar ki, akademik Zərifə xanım Əliyevanın qazandığı uğurlar Azərbaycan tibb elminin inkişafında yeni bir mərhələ təşkil edib. Qeyd olunub ki, görkəmli oftalmoloq alimin elmi-pedaqoji fəaliyyəti, gənc alim kadrların yetişdirilməsi və xalqın maariflənməsinə verdiyi töhfələr, həmçinin zəngin mənəviyyatı hər bir Azərbaycan vətəndaşı, alim və həkim üçün həyat məktəbidir.
