Ədalət Partiyası Ali Məclisinin iclası keçirilib, Mütəllim Rəhimlinin təşkilatdan çıxarılması barədə qərar qəbul olunub.
1xeber.media teleqraf-a istinadla xəbər verir ki, partiya sədrinin səlahiyyətlərini icra edən Ali Məclisin sədri Meydan Babayev gündəlikdə olan məsələləri elan etdikdən sonra qurultayın vaxtının və nümayəndəlik normasının müəyyənləşdirilməsi, qurultayın keçirilməsi üçün Təşkilat Komitəsinin yaradılması, partiya daxilində yaranmış vəziyyət və gələcək hədəflərdən bəhs edib.
Ali Məclisin qərarına əsasən, Ədalət Partiyasının qurultayı mayın 31-də keçiriləcək.
İclasda son vaxtlarda partiya daxilində yaranmış vəziyyət müzakirə olunub. Həmçinin Mütəllim Rəhimlinin iştirakı ilə onun son aylarda partiya daxilində subardinasiyaya əməl etməməsi, partiya daxilində regionçuluq təbliğatı aparması, nizamnaməyə zidd Ali Məclisin iclasını çağırması, bu struktur sədrinin səlahiyyətlərini mənimsəməsi, Ali Məclisin üzvü olmaya-olmaya iclası aparması, sədrin nizamnaməyə uyğun tətbiq etdiyi veto hüququna məhəl qoymaması halları gündəmə gətirilib. Eyni zamanda uzun müddət partiyanın təşkilatlanma prosesinin qarşısını məqsədyönlü şəkildə alaraq, nizamnaməni kobud şəkildə pozduğu qeyd olunub.
Törədilən nizamnamə pozuntularının ağır xüsusiyyətləri nəzərə alınaraq, Siyasi Şurada Mütəllim Rəhimli Ədalət Partiyasının üzvlüyündən xaric edilməsi barədə qərar qəbul olunub.
Qərar M.Babayevin təklifi ilə Ali Məclisin iclasında səsə qoyulub və dəstəklənib.
Xatırladaq ki, Mütəllim Rəhimli 1994-cü ildən Azərbaycan Demokrat Partiyasının (ADP) üzvü, 1995-ci ildən Mətbuat xidmətinin rəhbəri olub. Mətbuat xidmətinin rəhbəri olduğu dövrdə - 1998-ci ildə media ADP-ni “İlin partiyası” elan edib. 2000-ci ildə Ədalət Partiyası ilə Azərbaycan Demokrat Partiyası ayrıldıqdan sonra Ədalət Partiyasına keçib və Təşkilati məsələlər üzrə sədr müavini olub. İndiyədək bu vəzifəni yerinə yetirirdi.
Qeyd edək ki, Ədalət Partiyası 1993-cü ildə yaradılıb. 1996-cı il martın 30-da keçmiş Baş prokuror, sabiq ədliyyə naziri İlyas İsmayılovun rəhbərlik etdiyi Ədalət Partiyası və Azərbaycan Demokrat Partiyası (ADP) növbədənkənar iclas keçirərək birləşiblər. İlyas İsmayılov və Rəsul Quliyev partiyanın həmsədrləri olub. 2001-ci ildə Ədalət Partiyası ADP-dən ayrılmaqla bərpa qurultayı keçirib. İ.İsmayılov sədr seçilib.
İ.İsmayılov 2025-ci il fevralın 17-də vəfat edib.
Hazırda siyasi təşkilatın rəhbəri vəzifəsi boşdur. Partiya qurultay keçirib yeni sədr seçməlidir. Amma bu məsələ partiyada ciddi fikir ayrılığı və qarşıdurma yaradıb.
Partiyanın sədr müavini Mütəllim Rəhimli qurultayın keçirilməsini istəyir, Ali Məclisin sədri Meydan Babayev buna qarşı çıxır. Tərəflər bir-birinin qərarlarını tanımır.
İndiyədək dörd nəfər - Mütəllim Rəhimli, Meydan Babayev, partiya sədrinin hümanitar məsələlər üzrə müavini Vüsalə Dadaşova və Ali Məclis sədrinin birinci müavini Elçin Qurbanov liderlik iddiasını açıqlayıb.
