Bakı şəhər İcra Hakimiyyətinin başçısı Eldar Əzizovun səsləndirdiyi son fikirlər ictimaiyyətdə birmənalı qarşılanmayıb. Belə ki, Əzizov Azərbaycanda yaşayış səviyyəsinin yüksək olduğunu və ölkəmizin yalnız Fransa ilə müqayisə edilə biləcəyini diqqətə çatdırıb.
Həqiqət necədir? Bunun elmi, sosial və iqtisadi əsası var? Bakının başçısı niyə ölkəmizi məhz Fransa ilə müqayisə edib?
Globalinfo.az-a danışan REAL Partiyasının sədri, iqtisadçı Natiq Cəfərli deyib ki, Eldar Əzizovun hansı əsasla belə bir müqayisə apardığı bilinmir. Sadəcə minimum əmək haqqına baxsaq, Fransada bu göstərici təxminən 1800 manat ekvivalentindədir:
“Azərbaycanda isə minimum əmək haqqı 400 manatdır. Bu, çox ciddi fərqdir.
Minimum təqaüdə gəldikdə isə, Fransada bu rəqəm təxminən 2500–3000 manat səviyyəsindədir. Azərbaycanda isə son məlumata görə, minimum pensiya 320 manat təşkil edir. Bu rəqəmləri müqayisə etdikdə, necə olur ki, biz Fransayla eyni səviyyədə yaşayırıq? Bu müqayisənin hansı göstəricilər əsasında aparıldığı doğrudan da aydın deyil.
Görünür, bu bəyanat daha çox siyasi xarakter daşıyır. Fransa ilə münasibətlərin hazırkı vəziyyəti bəllidir. Bu münasibətlərin soyumasında əsas səbəbkar Fransadır. Ola bilər ki, bu cür çıxışlar həmin vəziyyətə cavab kimi ortaya qoyulur. Ancaq bu tip bəyanatlar cəmiyyət üçün inandırıcı görünmür və real faktlara əsaslanmadığı üçün daha çox sual doğurur”.
Ağ Partiya başqanı Tural Abbaslı isə məsələyə belə münasibət bildirib:
“Eldar bəyin fikirlərini oxudum. Amma bu yanaşma doğru deyil. Əhali arasında bu cür fikirləri eşidirmi, ya fransızların, digər MDB ölkələrinin yaşayış səviyyəsi haqqında məlumatlıdırmı?
Təbii ki, məqsəd bu müqayisələrlə Azərbaycanı aşağılamaq deyil. Amma reallıq odur ki, bir çox sahələrdə, xüsusən də sosial rifah, iqtisadi inkişaf və texnoloji imkanlar baxımından Azərbaycan hələ də inkişaf etmiş ölkələrlə müqayisədə bir qədər geridə qalır. Ən yaxşı halda, bəzi göstəricilər üzrə MDB ölkələri arasında yuxarı sıralarda ola bilərik. Amma bu, qlobal miqyasda kifayət deyil.
Bu deyilənlər daha çox rəsmi təbliğat xarakteri daşıyır, yəni məqsəd hökumətin apardığı siyasətin doğru olduğunu göstərmək və ictimaiyyətin bu siyasətə dəstəyini təmin etməkdir. Məncə, belə çıxışlar əslində uğur və ya dəstək yaratmaqdan çox, əks təsir bağışlayır. Yəni, xalqda narazılıq doğura bilər.
Ümumiləşdirsək, bu tip fikirlər nə ictimaiyyət arasında maraq oyadır, nə də iqtidarın və ya onu təmsil edən siyasi partiyanın mövqeyini gücləndirir. Əksinə, reallıqdan uzaq bəyanatlar bəzən cəmiyyətin reaksiyasına səbəb ola bilər. Məsələn, gəlin sorğu keçirək “Eldar Əzizov deyir ki, biz Fransayla eyni səviyyədə yaşayırıq”, xalq buna necə reaksiya verər?
Bəlkə də bu cür çıxışların məqsədi gündəmi dəyişmək və ya ictimai qəzəbi başqa yönə çəkməkdir, amma bu, real vəziyyətdən uzaqdır. Eldar müəllimə bir sual vermək istəyirəm:
Biz Fransa ilə eyni inkişaf səviyyəsindəyiksə, belə çıxır, ölkəyə güclü yağış yağanda Paris meri keçidlərin bağlanmasını, əhalinin boğulub ölməməsi üçün buradan keçməməyə çağırır? Əgər həqiqətən belə vəziyyət varsa, o zaman Eldar Əzizovun fikirləri ilə razılaşaram. Belə bəyanatlarla razılaşmaq çətindir. Çünki real vəziyyətlə uzlaşmır”.
