Pandemiya səbəbilə 2020-ci ildən etibarən bağlanan Azərbaycan Respublikasının quru sərhədləri artıq uzun müddətdir ki, bağlı qalır. Lakin son aylarda bu məsələ yenidən ictimaiyyətin və media gündəminin əsas mövzularından birinə çevrilib. Quru sərhədlərin nə zaman açılacağı, bunun hansı şərtlərlə baş verəcəyi və hansı ölkələrlə mərhələli şəkildə həyata keçiriləcəyi ilə bağlı cəmiyyət arasında suallar çoxalır.
Son zamanlar Azərbaycan hökumətinin quru sərhədlərin açılması ilə bağlı mövqeyində müəyyən yumşalma müşahidə olunur. Xüsusilə qonşu İranla münasibətlərin normallaşması fonunda bu dəyişiklik daha aydın hiss edilir. İran prezidenti Məsud Pezeşkianın Bakıya son səfəri zamanı tərəflər arasında mühüm məsələlər üzrə razılaşmaların əldə olunduğu bildirilir.
Bəs sərhədlərin açılması realdırmı?
Məsələ ilə bağlı Milli Məclisin deputatı Azər Allahverənov News24.az-a açıqlamasında bildirib ki, Gürcüstan tərəfi bu prosesdə daha fəal iştirak edir və artıq müəyyən dairələrdə konkret tarixlər də səsləndirilir:
“Azərbaycanla sərhədin açılması yönündə Gürcüstan tərəfi daha fəal iştirak edir. Hansı mənbələrə əsaslandığını deyə bilmərik, amma qonşu dövlət konkret tarix belə göstərir. Gürcüstanın baş nazirinin Azərbaycana səfəri zamanı bu məsələ də müzakirə olunub”.
Azər Allahverənovun sözlərinə görə, Azərbaycan tərəfi də aidiyyəti strukturlar səviyyəsində bu məsələyə münasibət bildirib. Lakin sərhədlərin rəsmi açılması üçün hələlik Nazirlər Kabinetinin mövcud karantin rejimi ilə bağlı qərarına dəyişiklik edilməlidir:
“İstənilən halda bu məsələ ilə bağlı qərar qəbul olunduqdan sonra rəsmi elan veriləcək. Ümumiyyətlə, quru sərhədlərindən söhbət gedirsə, Nazirlər Kabinetinin bununla bağlı öz rəyi var. Karantin rejimi hələ də mövcud olduğu üçün quru sərhədlər hələ də bağlıdır.”
Deputat qeyd edib ki, mövcud vəziyyətə baxmayaraq, Azərbaycan üzərindən Gürcüstan vətəndaşlarının keçidi, eləcə də Gürcüstan üzərindən Azərbaycana vətəndaşlarımızın quru yolu ilə qayıtması diplomatik kanallar vasitəsilə mümkün olur:
"Bu mexanizm hal-hazırda məhdud çərçivədə tətbiq edilir və tərəflər arasında əlaqələndirilmiş şəkildə icra olunur. Bundan əlavə, Naxçıvandan Türkiyəyə quru sərhədlə keçid məsələsi də gündəmdədir. Azər Allahverənov bu istiqamətdə də müsbət qərarların veriləcəyinə ümid etdiyini bildirib".
